Тактичката загатка за Арне Слот: Како да ги вклопи сите ѕвезди?

Ливерпул го урна рекордот во Премиер Лигата со ангажманот на напаѓачот Александер Исак од Њукасл за 125 милиони фунти. 25-годишниот Швеѓанец, кој постигна 27 голови минатата сезона, ќе го носи дресот со број девет, симбол на новата офанзивна ера што менаџерот Арне Слот ќе сака да ја изгради со паметна еволуција, а не драстична револуција. 

Покрај Исак, клубот во летниот трансфер прозор ги доведе и Хуго Екитике и Флориан Вирц, тројца млади, технички офанзивни играчи кои носат длабочина и разновидност во нападот. Овие засилувања се дел од планот за постепен премин во пост-Салах периодот, со оглед на тоа што Египќанецот влегува во последните две години од договорот. 

Сепак, не се очекува Ливерпул драстично да го смени својот систем. Арне Слот најверојатно ќе остане верен на четворка во одбраната, со мали прилагодувања во офанзивниот дел. Тактиките како тројца во задната линија или целосна формациска трансформација се верува дека не се во план во блиска иднина. 

Исак ќе биде првата офанзивна опција во 4-3-3 или 4-2-3-1 формација. Салах останува на десната страна, а Вирц може да игра централно, како креативна „десетка“ или напредена „осумка“ , во зависност од средниот ред. 

На левата страна се појавува најинтересната ротација: Екитике и Гакпо веројатно ќе се менуваат на таа позиција. Екитике носи директност и агресија, додека Гакпо е поискусен и посигурен во контролата на топката. Таа разлика му дава тактичка флексибилност на Слот, со можност да го адаптира тимот во зависност од ривалот. 

За Екитике, ваквата ситуација е совршена. Покрај добриот старт, сеуште се привикнува на темпото во Англија, и ќе добие минути за развој, без преголем притисок. Со соодветно менаџирање, може да стане важен дел од иднината на клубот. 

Иако Слот најверојатно ќе остане на проверена структура, има интересни алтернативи. На пример, 3-4-3 со Вирц и Салах како внатрешни напаѓачи зад Исак. Или 4-2-4 со Исак и Екитике како пар во нападот, особено во натпревари каде им е потребен брз гол. Овие сценарија нема да бидат редовни, но се можни варијации кога е потребно.