По вчерашниот дебакл на Јувентус од Галатасарај со 5-2 во Истанбул вечерва италијанскиот фудбал доживеа нов удар, Интер беше поразен на гости кај Бодо со 3-1.

Не беа домаќините толку многу подобар противник од „нераѕурите“, меѓутоа знаеа да ги искористат своите шанси и заслужено ќе патуваат со предност на реваншот во Италија. Изненадувањето го најави Фет по 20 минути игра. Интер брзо се врати и со голот на Еспозито десет минути подоцна израмни на 1-1.

Во второто полувреме, Интер повеќе ја имаше топката во свој посед, меѓутоа тешко создаваше посериозна прилика за гол. Бодо од друга страна набрзина во три минути во 61. и 64. постигна два гола за 3-1 и победа.

Изненадување видовме во Белгија каде што Клуб Бриж се врати од од негатива од два гола и одигра 3-3. Тргнаа одлично гостите од Мадрид и преку Алварез и Лукман во првиот дел обезбедија 2-0. Домаќините во вториот дел прво преку Онедика намалија на 2-1 во 52. минута, а на истекот на еден час игра и израмнија со голот на Тресоиди.

Атлетико на десетина минтуи пред крајот со автоголот на Ордонез дојде и до 3-2, но ниту тоа не беше доволно за победа бидејќи Цолис во завршница стрелаше за 3-3.

Во преостанатиот натпревар, Баер Леверкузен немаше проблеми и славеше со 2-0 на гости кај Олимпијакос.

Лидерот во Премиер лигата, Арсенал вечерва си дозволи да испушти предност од 2-0 против екипата на Вулвс која е последна на табелата и одигра само 2-2.

Многу рано избраниците на Артета дојдоа до водство, Сака го отвори резултатот по пет минути игра и тоа беше единствениот гол во првото полувреме. Арсенал преку Хинкапе по десетина минтуи игра во вториот дел дојде и до втор гол.

Тука изгледаше дека Арсенал нема да има проблеми. Сепак, Буено внесе одредена доза на неизвесност со голот во 61. минута за 2-1, а во финишот следуваше вистински шок. По едно недоразбирање во одбраната на Арсенал Калифиори си постигна автогол со што Вулвс дојде до само десеттиот бод од почетокот на сезоната.

По ова реми Арсенал на врвот има пет бода повеќе од второппласираниот Манчестер сити, меѓутоа тимот на Гвардиола е со натпревар помалку.

Њукасл може да го прославува пласманот во осминафиналето на Лигата на шампионите, откако во првиот плеј-оф натпревар го прегази Карабах на гостински терен со 1-6.

Англичаните му зададоа тежок удар на домаќинот во Баку, откако во првото полувреме имаа неверојатно висока предност од 0-5.

Ентони Гордон постигна рекордни 4 гола за него на еден меч од Лигата на шампионите, а петтиот беше дело на Малик Чао.

Во вториот дел домашните за момент јги израдуваа своите навивачи со голот на Јафаргулиев, но потоа следуваше еден убав гол на Марфи со кој Њукасл си ја врати предноста од пет гола разлика.

Реваншот на „Ст. Џејмс Парк“ се чини ќе биде само формалност.

Во потег што предизвика сериозни бранувања во шпанскиот фудбал, Реал Мадрид е на чекор до потписот на Ајмар Гарсија, еден од најталентираните дефанзивци на академијата на Атлетико Мадрид. Овој 18-годишен стопер, висок импозантни 192 сантиметри, важи за еден од најперспективните столбови на одбраната во системот на „Јорганџиите“. Трансферот има дополнителна тежина поради историското ривалство и премолчениот „пакт за ненапаѓање“ меѓу двата клуба, кој во последните години станува сè поневажен пред желбата за ангажман на врвни таленти.

Договорот се одвива со голема брзина. Според информациите на шпанските новинари, веќе е постигнат вербален договор меѓу претставниците на играчот и раководството на „Кралевите“. Договорот на Гарсија со Атлетико истекува во јуни, што му овозможува на Реал да го осигура неговиот потпис без обесштетување. Со овој потег, Реал Мадрид успеа да ја победи конкуренцијата од неколку европски гиганти кои будно ја следеа ситуацијата со неговиот договор, обезбедувајќи го младиот дефанзивец како слободен агент за следната сезона.

Идниот столб на „Ла Фабрика“ Гарсија е прототип на модерен централен бек: доминантен во воздухот, но исклучително присебен и технички поткован со топката во нозете. Се очекува по неговото пристигнување во јули, веднаш да биде приклучен кон „Ц“ тимот или Кастиља, каде ќе го продолжи својот развој. За Атлетико, губењето на ваков домашен талент во корист на најголемиот ривал е „горчливо“, додека за Реал ова е стратешка победа во долгорочното градење на тимот.

Медиумите од Германија пренесуваат дека Ник Волтемаде не е среќен во Њукасл и сака да се врати во Бундеслигата, како опции му се Штутгарт и Баерн Минхен. Во последните денови од летниот преоден рок, Њукасл го собори сопствениот рекордот и инвестираше околу 69 милиони фунти (околу 80 милиони евра) во ангажман на Ник Волтемаде од Штутгарт.

Напаѓачот одлично ја започна авантурата на „Сент Џејмс Парк“, постигна два гола на три натпревари во Премиерлигата, уште еден во Лигата на шампиони, па изгледаше како одлично засилување.

Но набрзо формата на Германецот почна да оди во надолна линија, па во последно време се појавија многу гласни за негово заминување.

Како што пренесува Билд, Ник Волтемаде не успеал да се прилагоди на животот во Англија, не е среќен во Њукасл и размислува за враќање во Германија.

На ум има две опции, односно повторно да го облече дресот на Штутгарт, или уште подобро за него, да направи трансфер во Баерн Минхен.

Како што пренесува весникот Сан, Манчестер јунајтед нема да ја искористи опцијата да го продолжи договорот на Џејдон Санчо за дополнителни 12 месеци, па Англичанецот летоска беспари ќе го напушти Олд Трафорд.

Минатиот месец, „ѓаволите“ соопштија дека Касемиро заминува по крајот на сезоната како слободен играч.

Манчестер јунајтед нема да ја искористи опцијата да го продолжи договорот на Бразилецот за 12 месеци, па инвестицијата од 70 милиони евра ќе си оди бесплатно.

На многумина ова им делува малку чудно, но клубот од Олд Трафорд си има своја математика, а како што пишува весникот Сан, ова ќе биде повторено и со Џејдон Санчо.

„Ѓаволите“ и за Англичанецот имаат опција да го продолжат договорот за 12 месеци, но нема да го сторат тоа и офанзивниот фудбалер ќе има одврзани раце да го напушти клубот.

За ангажман на Џејдон Санчо беа платени 85 милиони евра летото во 2021 година, но тој никогаш не се снајде во дресот на Манчестер јунајтед, шест месеци помина на позајмица во Борусија Дортмунд, потоа 12 месеци играше како позајмен во Челси, за оваа сезона да замине на нова позајмица во Астон Вила.

Баерн Минхен стави вето на евентуалниот трансфер, на Мајкл Олисе. Наводно, интерс за Олисе покажал Ливерпул. „Црвените“ веќе сега бараат замена за Мохамед Салах.

„Teamtalk“, пишува дека Французинот е микс од креативност, тактичка интелигенција и е навистина готов производ. Го означиле како идеална замена за Салах, кој и покрај тоа шт има договор до 2027 година, се очекува во летниот преоден рок да го напушти „Енфилд“.

Олисе не брза да се врати во Премиер лигата. Тој играше до 2024 година во Кристал Палас, а во Баерн стана еден од најдобрите напаѓачи во Европа. Даде 21 гол и 39 асистенции во Баерн.

Челниците на најтрофејниот германски клуб подготвиле нов договор за францускиот репрезентативец. Доколку ги прифати условите, Олисе ќе потпише со Баерн до јуни 2029 година.

Foto/ depositphotos

Ривалството меѓу Арсенал и Тотенхем се сели на трансфер пазарот, каде двата клуба се во директна битка за потписот на искусниот германски репрезентативец, Леон Горецка. Според последните информации, „Топчиите“ во моментов имаат значителна предност пред својот најголем ривал. Стабилноста на проектот на Микел Артета и речиси сигурниот настап во Лигата на шампионите се клучните фактори кои ja наклонуваат вагата кон Емиратите. Со оглед на тоа што договорот на Горецка со Баерн Минхен истекува во јуни, неговиот статус на слободен агент предизвика вистинска треска низ Европа.

Интересот на Артета не е само прашање на добра пазарна прилика, туку стратешки потег за зајакнување на физичката доминантност во средниот ред. Стручниот штаб на Арсенал во 31-годишниот Германец гледа играч со идентичен профил како Деклан Рајс: моќен box-to-box играч кој подеднакво добро ги извршува и дефанзивните и офанзивните задачи. Повредите во минатите сезони, кои чинеа скапо, покажаа дека на тимот му е потребна поголема ротација на позициите, а Горецка, со својата супериорност во воздушните дуели и способноста да постигнува голови од втор план, совршено се вклопува во тој концепт.

По осум трофејни години во Баерн, во кои освои шест титули во Бундеслигата и пехарот во Лигата на шампионите, Горецка е подготвен за нов предизвик. Иако во јануари одби понуда од Атлетико Мадрид за да ја заврши сезоната во Баварија , неговата желба за преселба е јасна. За Арсенал, ангажманот на играч со преку 60 настапи за Германија би значел и внесување на неопходното искуство и победнички менталитет во соблекувалната. Додека летото се приближува, на Емиратите расте оптимизмот за овој трансфер.

Во ера каде верноста кон клубовите често се доведува во прашање, а амблемот на градите се доживува како обичен симбол, Лисандро Мартинез се појавува како фигура која не потсетува на романтичните времиња на фудбалот. Аргентинскиот дефанзивец, кој навивачите на Олд Трафорд со гордост го нарекоа „Касапот“, никогаш не ги криел своите емоции, но неговите последни зборови откриваат врска со Манчестер Јунајтед која датира многу пред неговото пристигнување во 2022 година.

За многумина, Манчестер Јунајтед е само глобален бренд, но за Мартинез, овој клуб бил неговиот фудбалски учебник. Неговата опсесија со „Црвените ѓаволи“ започнала уште во детството, долго пред да го облече светиот дрес.

„За мене, Манчестер Јунајтед е навистина посебен“, истакнува Мартинез, нагласувајќи ја длабоката почит кон институцијата. Тој признава дека бил посветен гледач на клубот во неговиот најдоминантен период, тврдејќи дека ги има изгледано сите натпревари од ерата на Сер Алекс Фергусон. Ова не било само обично гледање фудбал, туку лекција за „Јунајтед начинот“: голови во последните секунди, немилосрден притисок и победнички менталитет кој ја дефинираше 26-годишната потрага по трофеи на славниот Шкотланѓанец.

Мартинез не се задоволува само со улогата на првотимец или миленик на публиката: тој игра за вечност. Иако клубот поминува низ турбулентен транзициски период, светскиот шампион е фокусиран на враќање на славните денови кои некогаш ги следел на телевизиските екрани.

„За мене, фудбалот е и тоа… да го запишеш своето име во историските книги“, објаснува тој. Со видлив глад за успех, Мартинез додава: „Се надевам дека наскоро ќе го достигнеме тоа ниво, бидејќи сакам да постигнам ГОЛЕМИ нешта овде“. Неговата цел е кристално јасна: не сака само да биде дел од тимот, туку сака да биде запаметен рамо до рамо со легендите кои ја обележија историјата на клубот.

За да се разбере неговата жестокост на теренот, мора да се разбере неговата хиерархија на вредности. Мартинез игра со интензитет кој често го остава со лузни, особина која ја припишува на неговата целосна посветеност на спортот.

Во момент на искреност, тој јасно ги постави своите приоритети: „По моето семејство, фудбалот ми е сè“. Ваквиот фокус го објаснува неговото експресно прилагодување во Премиер лигата и статусот на емотивен лидер во соблекувалната.

Претседателот на Барселона, Хоан Лапорта, упати директна и остра порака до критичарите, која звучи повеќе како повик за обединување отколку како обичен извештај за медиумите. Во период кога тимот се соочува со резултатски турбуленции, Лапорта застана во одбрана на својот стратег, но и сугерираше дека постои поширок заговор за да се спречи враќањето на каталонскиот гигант на врвот.

Реториката на Лапорта доби остар тон кога посочи дека отпорот со кој се соочува Барселона не е само од спортска природа: „Постојат луѓе кои не сакаат да победиме,“ изјави тој, потенцирајќи дека пречките често се „неспортски“. Иако не именуваше конкретни центри на моќ, алузијата е јасна: сенката на случајот „Негреира“ и постојаните финансиски судири со раководството на Ла Лига создадоа амбиент во кој клубот се чувствува како мета. Со ваквиот настап, Лапорта очигледно се обидува да создаде „заеднички фронт“ меѓу навивачите против надворешните притисоци.

И покрај повремените кризи кои го тестираат трпението на „кулесите“, Лапорта останува непоколеблив во поддршката за Ханси Флик. Тој ги отфрли сегашните потешкотии како природна фаза низ која минува секој голем клуб. Како темел за својот оптимизам, претседателот ја истакна силната синергија меѓу стручниот штаб и спортскиот директор Деко: „Ги познавам Флик и Деко, ја чувствувам атмосферата во соблекувалната,“ инсистираше тој, давајќи смело ветување: Барселона ќе ја освои Ла Лига. Неговата порака е јасна: неопходна е стабилност и враќање на самодовербата кај тимот.

Стратегијата за продолжението на сезоната се потпира на ментална цврстина. Лапорта ја опиша соблекувалната како изолирана единица која е отпорна на „неспортските агенди“ што ја опкружуваат. Карактеризирајќи ги играчите како „целосно фокусирани и подготвени за борба до крај“, тој го подготвува теренот за висок влог во вториот дел од првенството. Дали овој пркос ќе се круниса со трофеј, останува да видиме, но едно е сигурно: Лапорта нема намера да отстапи, а секој евентуален неуспех ќе го толкува не само како спортски пораз, туку како победа на оние кои му посакуваат лошо на клубот.