Голманот на Баерн, Мануел Нојер следниот месец ќе наполни 39 години, но нема намера да се пензионира.

Славниот германски голман потпиша нов едногодишен договор со баварскиот гигант, што значи дека ќе има 40 години кога ќе истече на 30 јуни 2026 година.

Неговиот стар договор истече во јуни и на почетокот на годината најави продолжување на соработката, која беше официјализирана во понеделникот.

„Мануел Нојер го продолжи договорот со клубот до 2026 година“, објави Баерн на социјалните мрежи и на клупскиот портал.

По тој повод се огласи и спортскиот директор на Баерн, Макс Еберле.

-Мануел Нојер е најдобриот голман во својата генерација и икона на Баерн. Кога зборувате за голман во наше време, зборувате за Мануел Нојер, и тоа ширум целиот свет, рече Еберле.

Нојер во славниот клуб од Минхен пристигна во 2011 година од Шалке. Со Баварците 11 пати беше германски шампион (11 последователни сезони од 2013 до 2023 година), пет пати го освои Купот на ДФБ и двапати Лигата на шампионите.

Бенфика и официјално го објави потписот со напаѓачот Андреа Белоти, кој до крајот на сезоната пристигнува на позајмица од Комо. Тој во својот нов клуб ќе го носи дресот со број 19.

Белоти (31) беше донесен во тимот на Сеск Фабрегас минатото лето. Сепак, тој беше со статус на резерва, забележа само 650 минути на 19 натпревари, на кои постигна само 2 гола. Белоти досега играше само во Италија, а покрај тимот на Комо ги носеше и дресовите на неговиот матичен клуб Албинолефе, Палермо, Торино, Рома и Фиорентина.

Покрај тоа, тој има 44 натпревари со 12 гола и 7 асистенции за италијанската репрезентација со која триумфираше на Евро 2020 година.

27-годишниот дефанзивен играч за врска на Милан, Исмаел Бенасер, остатокот од сезоната ќе го помине на позајмица во Олимпик Марсеј, објави прес-службата на францускиот клуб. Договорот вклучува и право на купување на фудбалерот.

Бенасер оваа сезона играше на осум натпревари на Милан во сите натпреварувања, давајќи една асистенција. Договорот на играчот со италијанскиот клуб е до крајот на јуни 2027 година. Проценетата вредност на фудбалерот, според интернет порталот Трансфермаркт, е 14 милиони евра.

Претходно, алжирскиот репрезентативен играч за врска играше и за Емполи и беше дел од системот на лондонски Арсенал, каде одигра еден натпревар за главниот тим.

Раководството на Астон Вила официјално го објави потписот на централниот дефанзивец Аксел Дисаси од Челзи. Францускиот дефанзивец ќе игра на „Вила Парк“ како позајмен до крајот на сезоната.

Трансферот помеѓу Астон Вила и Челзи беше финализиран во последните минути од зимскиот трансфер период.

Сериозен интерес за Дисаси имаше и од Тотенхем, но самиот играч повеќе сакаше да потпише со екипата од Бирмингем.

Договорот на играчот со Астон Вила не вклучува опција за негов откуп, што значи дека дефанзивецот сигурно ќе се врати на „Стемфорд Бриџ“ на крајот од сезоната.

Напаѓачот на Баерн Минхен, Матис Тел и официјално му се приклучи на англискиот клуб Тотенхем во последните часови од зимскиот преоден рок.

19-годишниот Французин оди на позајмица во лондонскиот клуб до крајот на сезоната. Договорот вклучува опција за откуп по истекот на периодот на позајмица. Во екипата на Тотенхем играчот ќе го носи дресот со бројот 11.

Според познатиот спортски новинар Фабрицио Романо, Тотенхем на лето ќе може да го купи напаѓачот за сума од 60 милиони евра.

Оваа сезона Тел одигра 14 натпревари во сите натпреварувања, на кои има само една асистенција. Првично, тој одби да им се приклучи на лондончани, но со оглед на малата минутажа што ја добива, реши да го направи овој потег.

Македонскиот стопер Јован Манев ќе има нов клуб, затоа што си замина од редовите на турска Адана Демирспор чии бои ги бранеше во изминатите три години.

24-годишникот беше дел од Адана од 2022 година, во меѓувреме имаше една позајмица во Осијек. Сепак, тој се заблагодари на тимот и на раководството, па тргнува во нов предизвик. Манев ќе продолжи во Хрватска, каде прави трансфер во Ријека.

Манев во кариерата играше уште и за Осогово и за Брегалница од Штип. За сениорскиот тим на Македонија има седум настапи и еден постигнат гол.

Најдобриот играч на Работнички во првиот дел од сезоната, Али Регба, кариерата ќе ја продолжи во Марибор.

Марибор ја доби трката со ТСЦ од Бачка Паланка за потписот на Алжирецот со ирски пасош. Српскиот клуб на Работнички му понудил 50.000 евра, а Марибор три пати поголема сума.

Регба е најзаслужен за добрите резултати на Работнички во есенскиот дел од сезоната, постигна седум гола и забележа пет асистенции.

Регба во Работнички пристигна минатиот февруари.

Милан постигна договор со Челзи за позајмица на Жоао Феликс, пренесува Танзи Лоик, новинар на „Лекип“.

Португалскиот напаѓач со денови се поврзуваше со трансфер во Милан, а како што стојат работите, двата клуба постигнаа договор на истекот на преодниот рок. Феликс ќе го напушти Челзи по само шест месеци, откако му се приклучи на англискиот клуб минатото лето од Атлетико Мадрид. „Сините“ на Атлетико му платија 52 милиони евра за трансферот на Португалецот.

Донесен како големо засилување, Феликс не успеа да му се напетне кај тренерот Енцо Мареска. Во Премиер лигата речиси и да не играше, место во тимот имаше само во Лига купот и Конференциската лига.

Феликс има договор со Челзи до јуни 2030 година. Позајмицата Милан ќе ја плати пет милиони евра. Во договорот не постои клаузула за откуп на договорот.

Феликс кариерата ја започна во Бенфика, во 2019 година се пресели во Атлетико за клупски рекорд од 126 милиони евра. Не ги оправда вложените пари, па Атлетико го испраќаше на позајмици во Челси и Барселона.

Партизан би можел да потпише со македонскиот репрезентативец Бојан Димоски.

Левиот бек од рускиот клуб Акрон би можел да пристигне во Белград на позајмица, со опција за откуп од 200.000 евра.

Преговорите меѓу двата клуба се во завршна фаза, пишува српски „Телеграф“.

Димоски е во Русија од летото 2023 година, а претходно играше една сезона во Вардар и три во Академија Пандев.

За репрезентацијата на Македонија досега има одиграно 18 натпревари.

Селекторот на нашите најдобри фудбалери, Благоја Милевски, имаше можност во изминатите денови да ги следи настапите на нашите екипи во Анталија во рамките на подготовките за вториот дел од сезоната.

„Впечатоците од мечевите на македонските екипи во Анталија се навистина позитивни. Помалку изненадувачки, очигледна беше разликата во ритамот на фудбалерите во однос на домашното првенство. Видовме нова енергија, тимски дух, добар ритам и желба за докажување. Се надевам дека тоа ќе го пренесат и на натпреварите од МФЛ“ – рече Милевски за сајтот на ФФМ.

„Тоа е нешто што се бара во модерниот фудбал. Тоа беа средби без резултатско значење но, сепак даваат одредена слика за квалитетот на екипите и индивидуалните карактеристики на фудбалерите. Продолжуваме да ги следиме сите фудбалери за кои веруваме дека имаат репрезентативен потенцијал“ – беа зборовите на Милевски.