Победникот на клупскиот Мундијал Челси, ќе биде исклучително активен до крајот на преодниот рок. „Сините“, во досегашниот тек од преодниот рок потрошија 290 милиони евра, се засилија со Жоао Педро (70 милиони), Џејми Гитенс (65 милиони), Естевао (34 милиони), Лиам Делап (35,5 милиони), Јорел Хато (42 милиони).

Челси, во овој момент има многу фудбалери на платниот список, па ќе мора да продава и да позајмува за да направи место во составот и буџетот.

Мадуеке и Кепа заминаа во Арсенал, Петровиќ во Борнмут, а Жоао Феликс во Ал Наср. Италијанскиот инсајдер Николо Скира пишува дека Челзи сака да се ослободи од дури 16 играчи кои не се во плановите на менаџерот Енцо Мареска до крајот на преодниот рок.

Наводно им било кажано дека можат да бараат нов клуб или да одат некаде на позајмица. Меѓу нив се „јаки“ имиња како Николас Џексон, Кристофер Нкунку и Рахим Стерлинг.

Мареска не смета на следниве играчи:

– Веига
– Брете
– Сар
– Бадијашил
– Анселмино
– Чилвел
– Гилкрист
– Угочукву
– Чуквуемека
– Дјусбери-Хол
– Паес
– Стерлинг
– Џексон
– Енкунку
– Нумберс
– Адер

Витор Реис, суперталентираниот 19-годишен стопер, сака да го напушти Манчестер сити.

Бразилецот пристигна во Англија во јануари оваа година во трансфер вреден 30 милиони евра од Палмеирас.

Поради малата минутажа кај Пеп Гвардиола, тој сега сака да оди на позајмица во клуб каде што ќе добие шанса да игра во континуитет.

Рубен Дијаш, Јошко Гвардиол, Мануел Аканџи, Нејтан Аке, Џон Стоунс и Абдукодир Хасанов моментално се на неговата позиција во клубот, младиот Бразилец е свесен дека ќе има малку можности за игра.

Англиските медиуми ги споменуваат Порто и Баер Леверкузен како опции за Реис.

Интер стана лидер по приходи од ТВ права помеѓу клубовите од Серија А во сезоната 2024/25, објави „Газета дело Спорт“.

Клубот од Милано доби 81,6 милиони евра од ТВ права.

Во Топ 5 на оваа листа покрај Интер се: Наполи – 67,8 милиони евра, Јувентус – 67,7 милиони евра, Милан – 67,3 милиони евра и Рома – 61,2 милиони евра.

На крајот од сезоната 2024/25, Наполи ја освои Серија А, Интер се најде на второто место, а Аталанта на третото.

Фудбалерките на ЖФК Љуботен обезбедија убедлива победа од 4-1 против екипата на Рунавик од Фарските Острови, во полуфиналниот натпревар од квалификацискиот мини-турнир за пласман во Лигата на шампиони.

Иако натпреварот започна шокантно за тетовската екипа – противничката фудбалерка Бенбакура во 12. минута ја искористи невнимателноста на одбраната и го донесе Рунавик во водство – избраничките на Љуботен брзо се консолидираа и возвратија со жесток напаѓачки притисок.

До крајот на првото полувреме македонскиот шампион постигна три погодоци. Прво израмни Марковска, потоа Мустафа го сврте резултатот во корист на Љуботен, а Максути ја зголеми предноста на 3-1 пред паузата.

Во второто полувреме, во 63. минута, Охадиве го постигна четвртиот гол и го завери триумфот, со што тимот од Тетово сигурно чекори кон следната фаза.

Тренерот на Шкендија, Јетон Беќири, беше задоволен по историската победа на својот тим над романскиот ФЦСБ во Букурешт, во натпревар што привлече големо внимание на европската сцена.

„Ова е навистина голема победа за нас. Да се совлада екипа со ваков квалитет, пред ваква публика и во ваква атмосфера, не е мала работа. Сакам да им честитам на сите играчи, на клубот, на навивачите, на секој кој е дел од Шкендија“, изјави Беќири веднаш по натпреварот.

Во текот на изминатата недела имаше провокациите од страна на домашната екипа, посебно пред натпреварот, а Беќири покажа респект кон противникот.

„Импресиите се силни. И покрај сите провокации, имам голем респект за ФЦСБ. Станува збор за клуб со традиција, имаат сопственик кој вложува сериозно во фудбалот и тренер кој знае што прави. Но, јас сум научен дека фудбалот не се добива преку изјави, туку се игра и решава исклучиво на терен“, додаде Беќири.

Победата во Букурешт е голем чекор напред за Шкендија, затоа што тимот обезбеди минимум 5 милиони евра финансиска добивка, а исто така обезбеди место во групите на УЕФА.

Напаѓачот Виктор Осимен пристигна во Истанбул за да го комплетира трансферот во турскиот клуб Галатасарај.

Галатасарај објави фотографии од средбата на фудбалерот со навивачите на аеродромот. Претходно беше објавено дека Наполи ќе добие 75 милиони евра во две плаќања за напаѓачот.

Минатата сезона, Виктор Осимен играше за Галатасарај како позајмен играч. Тој одигра 30 натпревари во турското првенство, постигнувајќи 26 гола и запишувајќи 5 асистенции.

Светското првенство 2026 ќе се игра во САД, Канада и Мексико, првпат три земји ќе бидат ко-домаќини на еден Мундијал, а уште една новина е што ќе учествуваат 48 селекции.

Како што пренесува „ЕСПН“, ждрепката за групната фаза ќе се одржи на 5 декември во Лас Вегас. Интересно е што токму Лас Вегас беше домаќин на ждрепката и пред СП 1994, кога Американците самостојно ја организираа завршницата.

Форматот ќе донесе 12 групи, а веќе се знае дека Мексико ќе биде во Групата А, Канада ќе игра во Б, додека САД ќе бидат сместени во Групата Д. Натпреварите ќе се играат во 16 града. 11 во САД, три во Мексико и два во Канада, а големото финале ќе се одигра на „Метлајф“ стадионот во Њу Џерзи.

Покрај трите домаќини, досега пласман на СП 2026 обезбедија уште десет репрезентации. Надеж дека ќе се најде за првпат на Светското првенство има и Македонија. Прво, нашата репрезентација котира добро во квалификациската група за Мундијалот, но добро котира и преку Лигата на нациите да се избори за бараж. Математики има милион, а Македонија сонува дека за првпат ќе заигра на планетарниот собир.

УЕФА го назначи португалскиот судија Жоао Пињеиро да го суди финалето на Европскиот Суперкуп помеѓу Пари Сен Жермен и Тотенхем на 13 август на стадионот Фриули во Удине. Францускиoт гигант ја освои Лигата на шампионите, додека Тотенхем го победи Манчестер Јунајтед и го освои својот прв меѓународен трофеј по повеќе од 40 години.

37-годишниот Португалец е меѓународен судија од 2016 година, а негови помошници ќе бидат неговите сонародници Бруно Жесус и Лучијано Маја. Четвртиот судија ќе биде Елхин Масиев од Азербејџан.

Судии на ВАР системот ќе бидат Португалците Тијаго Мартинс и Фабио Мело, како и Пол ван Бокел од Холандија.

Пињеиро има судено 68 средби во натпреварувањата на УЕФА, вклучувајќи го и финалето на Лигата на шампионите помеѓу ПСЖ и Интер Милан (5-0).

Шкендија забележа победа на гостувањето кај ФЦСБ во Букурешт и испиша своја клупска историја. По пауза од осум години Македонија повторно ќе има претставник во групна фаза на едно натпреварување на УЕФА.

По Вардар во сезоната 2017/18 во Лигата на Европа, сега тетовска Шкендија во најмала рака ќе настапи во групите од Конференциската лига. Тетовчани вечерва во Букурешт ја совладаа екипата на ФЦСБ со 1-2 или вкупен резултат 3-1 и со тоа обезбдеија пласман во следното коло од квалификациите за Лигата на шампиони. Следен противник на Шкендија ќе биде Карабах.

Во 28. минута домаќинот го отвори резултатот. Стрелец на голот беше Цисоти, кој на додавање на Бирлигеа го совлада Гаје.

Сепак, радоста на домаќините не траеше долго затоа што Шкендија експресно реагираше. Левото крило на тетовчани, Љатифи одлично се снајде во мешаницата пред голот на ФЦСБ и легнат на земја успеа да шутира и да ја смести топката во посакуваната цел за 1-1, резултат со кој се замина на одмор.

Бесарт Ибраими во 80. минута повторно имаше голема шанса по една убава акција на тетовчани, топката дојде до искусниот напаѓач, кој од чиста позиција од десетина метри биеше високо над домашниот гол. Сепак, добрата игра на Шкендија беше наградена во 86. минута, кога резервистот Ване Крстевски со помош на блокот на домашната екипа ја смести топката во противничката мрежа и ѝ донесе нова победа на својата екипа во овој двомеч, а воедно и пласман во третото коло од квалификациите во Лигата на шампионите.

Во третото коло Шкендија ќе се игра против Карабах, а во случај на неуспех се префрлува во плеј-офот од квалификациите за Лигата на Европа. Доколку Шкендија биде елиминирана есенва ќе настапи во групната фаза од Конференциската лига.

Манчестер сити го потврди враќањето на голманот Џејмс Трафорд, кој пристигна од Барнли во трансфер што претставува британски рекорд за играч на таа позиција. Овој 22-годишник се враќа на „Етихад“, стадионот каде што ја започна кариерата, во трансфер вреден 36 милиони евра. Сумата на крајот би можела да биде поголема бидејќи зависи и од бонусите.

Гвардиола достигна еден вид рекорд со овој трансфер на „граѓаните“, бидејќи стана првиот тренер во историјата на фудбалот кој потрошил повеќе од две милијарди евра за засилувања во текот на својата кариера.

Голманот Трафорд е 96-ти играч за кого Шпанецот платил отштета во својата тренерска кариера.

Најблиску до Гвардиола по пари потрошени за трансфери е, верувале или не, Диего Симеоне со 1,31 милијарди евра потрошени за засилувања во Атлетико Мадрид.

По нив следува Масимилијано Алегри, кој потрошил 1,2 милијарди за трансфери во Милан и Јувентус, пред сè, иако ги предводеше и Каљари, Сасуоло, Гросето, Спал и Аљанезе, потоа Томас Тухел со 1,19 милијарди (Мајнц, Борусија Дортмунд, ПСЖ, Челзи, Баерн) и Антонио Конте со 1,16 милијарди (Бари, Аталанта, Сиена, Јувентус, Челзи, Интер, Тотенхем, Наполи).