Иако играа мотивирано и имаа шанси, битолчани не успеаја да ја конвертираат повремената теренска надмоќ во погодок, а потоа кога нивното темпо опадна, Струга безмилосно ги казни. Пелистер започна агресивно и преку Мирко Ивановски како најистурен играч се обиде да направи ран притисок. Таквиот пристап ја донесе првата шанса токму кога центарфорот на битолчани беше соборен во расчекор додека ја минуваше линијата на шеснаесетникот, но главниот судија Влатко Илиоски немаше храброст да покаже на белата точка. Слободниот удар го изведе Србијанац, но таа топка погоди во глава еден од играчите во живиот ѕид и не донесе натамошна опасност по голот на домашните.

Во 13. минута по левата страна Керим поведе напад на Пелистер, го пронајде Ивановски, но овој оцени дека не може да бие и со глава ја врати топката кон помладите соиграчи кои не ја прочитаа неговата инстинктивна реакција, па одбраната на Струга ТЛ ја расчисти опасноста.

Струга ТЛ делуваше мошне неорганизирано во своите додавања, па наместо вистинска акција видовме неколку соло обиди од нивни играчи. Во 22 минута Ласана Дијако биепе од 25 метри, а Јовчевски беше на своето место, но не успеаја сосема да ја скроти топката која минимално отскокна пред него, доволно за Компаоре да се обиде да ја шутне, но успеа само да го повреди голманот на битолчани. Судијата Илиоски оцени дека не треба да покаже картон за ваквиот старт во казнениот простор каде што голманот е неприкосновен. Гостите полека ја преземаа иницијативата и се обидуваа да создава шанси на половината на противникот, но видовме само некои обиди за удари кон голот на Јовчевски, најпрвин од Шабани кој се посрамоти, а потоа и од Радевски кој барем успеа да ја погоди топката иако таа отиде далеку од голот.

Во последните 15 минути од првиот дел имаше чести прекини, но обидите за тресење дојдоа во контранападите. Во 31 минута Ивановски беше во центарот на транзицијата на противничката половина, избра во празно да го проигра Керим, но овој втрча во шеснаесетникот без да успее да ја внесе и топката, па откако се врати чекор назад, веќе беше опколен од противничките дефанзивци. Воша ги предводеше нападите на Струга ТЛ по десната страна, а најдобриот потег го направи во 45 минута кога наместо да ги бара Бојку или Компаоре, успеа во казнетиот простор да го пронајде Марјан Радевски.Тој пак во манир на искусен голгетер со глава ја погоди мрежата на Пелистер, доминирајќи преку Христијан Стојановски, кој можеби очекуваше прекршок,но веќе претходно во повеќе случаи се виде дека судијата Илиоски толерираше погруба игра.

Тренерот на Пелистер, Милан Стојаноски направи три измени на стартот од вториот дел, но не успеа веднаш да ја врати иницијативата кај битолскиот тим.

Во 60 минута по стартот над Бошковски, нововлезениот Булатовиќ се обиде да нафрли од левата страна, но всушност одбиената топка послужи за контранапад, при што на крајот при една несмасна интервенција на повеќе играчи од одбраната на домашните, Радевски од десно ја погоди стативата. Можеби тој момент беше повик за будење, па Пелистер во следниот напад се избори за корнер по шутот на Ивановски кој можеше да довде до ефектен автогол. По корнерот, мрежата на Анџелети беше затресена, но судијата го поништи голот по рекламација на помошниот судија, а потоа и проверката од ВАР собата ја потврди таа одлука.

Во 73. минута Ристевски од десната страна упати добар центаршут, а Петковски се најде во ситуација да шутира, но Анџелети реагираше и ја одбрани најдобро изработената шанса на Пелистер.

Два одлични контранапади донесоа возбуда во 75. минута по промените кои ги направи Бленди Шкемби, при што во првата ситуација нововлезенот Малески имаше шанса за Струга ТЛ, додека на спротивната страна Бошковски и Петковски се обидоа, но не успеаја да го надмудрат Анџелети. Струга ТЛ беше физички доминантна во финишот, лесно се пробиваа на противничката половина. Компаоре се проби по десната страна во 79. минута, брутално го фаулираше Стефан Спироски, влезе во шеснаесетникот и постигна гол. Додека играчите на гостите се радуваа, повторно беше потребна реакција од ВАР собата и поништување на она што не го виде Влатко Илиоски.

Конечниот резултат беше постигнат во 87. минута кога Малески ја поведе акцијата на гостинскиот тим по средината, го проигра Јефтовски во лево кој велезе во шеснаесетникот па ја врати топката до Малески, кој рутинирано реализираше без чувар крај себе.

До крајот Малески имаше уште една шанса за погодок, но биеше над голот. Пелистер останува без постигнат гол на трета средба по ред, а со тоа и на 23 бода кои му го носат десеттото место на табелата.

Македонската репрезентација денеска ги започна подготовките за претстојниот плеј-оф натпревар против Данска за пласман на Светското првенство. Под водство на новиот селектор Гоце Седлоски, националниот тим одработи тренинг во тренинг центарот „Петар Милошевски“.

Во отсуство на неколкумина фудбалери кои се очекува да му се приклучат на тимот во текот на вечерта, своите први импресии ги сподели еден од новајлиите, Себастијан Херера од Борац Бања Лука. Тој истакна дека тимот треба да биде максимално мотивиран и да верува во сопствениот квалитет пред гостувањето во Копенхаген на 26 март.

„За мене ова е нешто најголемо што може да се случи во мојата кариера, да го облечам дресот на Македонија. Навистина е чест и огромно задоволство што сум тука. Ќе дадам сè од себе за да помогнам на репрезентацијата. Ова го посакував, го чекав и го сонував долго време и среќен сум што конечно дојде моментот. Со нетрпение очекувам да започнеме.

Најважно е да бидеме тим, сите заедно. Знам дека на мојата позиција Алиоски има големо искуство и многу години во репрезентацијата, и тоа е дополнителна мотивација. Очекувам тежок натпревар. Данска е силна репрезентација, но ние се фокусираме на нас самите. Верувам дека натпреварот е 50-50 и дека сè зависи од нас. Одиме максимално мотивирани и се надевам на позитивен резултат, зошто да не и пласман во финале.“

Многу нешта се случуваат во Манчестер Јунајтед, а сето тоа требаше да се заокружи со победа на вечерашниот натпревар против Борнмут.

Сепак, според тврдењата од Англија, по натпреварот против Борнмут, Мајкл Керик и не беше особено задоволен од играта на својот тим.

Наводно, во последно време Керик „се двоумеше“ дали да тргне по ѕвездата на Баерн од Минхен, Алфонсо Дејвис.

Тој наводно веднаш по натпреварот со Борнмут ги повика челниците на Манчестер Јунајтед и им порача да „тргнат“ по левиот бек на Бајерн од Минхен.

Дејвис на почетокот на сезоната беше во последната година од договорот со тимот од Минхен, но потпиша нов договор.

Фудбалската федерација на Македонија (ФФМ) денеска го одржа годишното редовно Собрание на кое беа потврдени суспензиите на ОФС Кичево и ОФС Охрид.

Претседателот на ФФМ, Масар Омерагиќ кажа дека по 15 години Статутот на ФФМ е усогласен со УЕФА.

„По 15 години, конечно ставаме крај на еден застарен, нефункционален систем и воведуваме ред. Статут изработен со УЕФА и ФИФА, кој не остава простор за импровизации. Да бидеме искрени, досега не зборувавме за реален фудбал, туку за бројки што не постојат. До последната пре-регистрација биле регистрирани 44.996 фудбалери во машка конкуренција. После пререгистрацијата бројот на машки фудбалери е 14.210. Во следниот период ќе се утврди точната бројка и во женска конкуренција“, кажа Омерагиќ.

Тотенхем и натаму никако не може да се спаси од кризата со бројни повреди откако лондончани останаа без првиот голман.

Ремито без голови против Нотингем Форест во неделата изгледа ќе биде последно за голманот Гуљелмо Викарио.

29-годишниот Италијанец ќе биде опериран поради хернија и би можел да биде надвор од терените повеќе и од еден месец.

„Малата интервенција е временски темпирана така што ќе има што е можно минимално влијание“, објавија од клубот.

Операцијата значи дека Викарио нема да биде и со селекцијата на Италија која во четврток ќе игра против Северна Ирска во баражите за СП 2026.

Доколку предвидувањето на клубот за едномесечна пауза е точно, тој ќе пропушти два важни натпревари од Премиер лигата. Прво, гостувањето кај Сандерленд на 12 април, а потоа и средбата со Брајтон дома во Лондон шест дена подоцна.

Тотенхем ќе остане без својот прв голман во следниот период, откако клубот одлучи Гиљермо Викарио да замине на хируршка интервенција поради проблем со кила. Одлуката е донесена операцијата да се изврши во текот на репрезентативната пауза, со што ќе се избегне подолг изостанок од натпревари.

Добра вест е дека Италијанецот прво ќе брани на дуелот со Нотингем Форест, по што ќе следи зафатот и рехабилитацијата која се очекува да трае околу еден месец.

Ова значи дека Игор Тудор ќе мора да пронајде ново решение меѓу стативите. Во прв план е младиот Антонин Кински, но неговиот последен настап против Атлетико Мадрид не влева голема сигурност, бидејќи направи сериозни грешки и беше повлечен од игра уште во раната фаза.

Покрај тоа ниту хрватскиот тренер не помогна бидејќи го замени уште во 17. минута, а Кински го напушти теренот во солзи.

Фудбалерите на Ливерпул запишаа пораз во Брајтон (2-1), во 31-то коло од Премиер лигата.

Ливерпул пристигна на „Амекс“ без повредениот Мохамед Салах, додека Уго Екитике се повреди на почетокот на натпреварот. Во осмата минута ја напушти играта со солзи во очите. Веројатно станува збор за посериозна повреда.

Брајтон поведе во 14-та минута, кога, по центаршутот на Гомез, Велбек со глава ја испрати топката во мрежата на Мамардашвили, кој го замени Алисон на овој натпревар.

Ливерпул на тој начин беше казнет за промашувањето на Доминик Собослај само неколку минути претходно.

Сепак, „Црвените“ имаа одговор. По точно половина час игра, Милош Керкез имаше соло пробив и успеа да ја надмудри одбраната на сино-белите, а потоа ја искористи грешката на Луис Данк и мајсторски го совлада Вербруген.

Второто полувреме во целост им припадна на играчите на Брајтон. Во 56-та минута, ветеранот Велбек го постигна вториот гол.

Пред и по вториот гол на Велбек, Брајтон имаше неколку шанси, од кои не успеа да постигне гол.

По овој пораз, Ливерпул останува на петтото место со два бода помалку од Астон Вила и пет од Манчестер Јунајтед.

Брајтон, сега е осми, му се доближи на тимот од Енфилд на само шест бода. .

Во следната рунда, Ливерпул ќе се сретне со Фулам, а Брајтон ќе гостува кај Барнли.

Селекторот на Англија, Томас Тухел, го објави списокот за пријателските натпревари против Уругвај на 27 март и против Јапонија на 31 март.

Германскиот стратег повика вкупно 35 фудбалери, меѓу кои е и Џуд Белингам, додека неговиот соиграч во Реал Мадрид, Трент Александер-Арнолд, не е на списокот.

Меѓу повиканите има пет голмани: Џордан Хендерсон, Џордан Пикфорд, Арон Рамсдејл, Дин Стил и Дејвид Трафорд.

Се враќаат Хари Мегваер и Коби Мејну од Манчестер јунајтед, но во селекцијата ќе ги нема искусните фудбалери Лук Шо и Џек Грилиш

Фудбалерите на Македонија Ѓорче Петров одиграа рамноправно прво полувреме со фаворитот Шкендија, но не успеаја да постигнат гол во сериозните шанси што успеаја да ги создадат во средината на првиот дел.

По почетното испитување на силите, првата шанса за „лавовите“ дојде во 18 минута, кога по десната страна Ајдоган Огузхан успеа да бие, но беше непрецизен. Во следниот напад одбиената топка млако ја зафати Софијаноски, па Шкендија имаше можност за брзи контри на спротивната страна.

Првата шанса за гостите дојде во една сомнителна офсајд ситуација, но помошниот судија веднаш рекламираше и голот беше поништен. Во 25 минута продор и шут по десната страната, но одбиената топка дојде до Бесарт Ибраими кој беше изненаден и не успеа да ја скроти, па биеше над пречката.

До крајот на првиот дел повторно блага теренска иницијатива на домашните која резултираше со шанса од работ на шеснасетникот, а нафрлената топка со глава беше лесен плен за гостинскиот чувар на мрежата. Шкендија се избори за слободен удар од десната страна, но Јанков го скроти шутот на Спахиу.

Обата тима многу претрчаа, но Шкендија успеа да ја задржи свежината и да доминира во транзицијата за време на вториот дел. Во 53 минута, мат во два потега: одбранбениот фудбалер на Шкендија, Имран Фетаи од средина на својата половина од теренот, упати топка која ја прифати Красниќи на спротивната страна дури кај шеснаесетникот на Македонија ЃП и биеше прецизно во мрежата на Јанков, кој се чини очекуваше офсајд според реакциите на публиката. Но, голот беше верификуван и тетовчани поведоа со 0:1.

Шкендија можеше во неколку наврати да го зголеми водството, прво во 75 минута кога соло продорот по десната страна резултираше со корнер по интервенцијата на Јанков. По изведениот удар од Зејнулаи, на спротивната страна Рамадани успеа да ја протне топката кај пеналтикот, но немаше кој да го казни киксот на одбраната на скопскиот тим. Во два наврати брзи контри во 84 и 89 минута на речиси идентичен начин завршија со проигрување на Н`Зенге, но во двата случаи Јанков одлично интервенираше. Во продолжението, свои шанси имаше и Фабрис Тамба, но се посрамоти со лоша реакции.

Домашните паднаа со играта, иако имаа посед на топката и се обидуваа да создадат шанси, но едноставно не успеваа да организираат акција која ќе го загрози голот на Бабоукар. Со овие три бода Шкендија се изедначи со Вардар и двата тима сега имаат по 58 бода на врвот од табелата. Македонија ЃП останува на 23 бода, еден повеќе од Пелистер и Работнички кои бараат спас од дното на табелата.

Арсими го совлада Вардар на домашен терен со 1-0, и ја направи битката за титулата уште поинтересна, откако и Шкендија триумфираше над Македонија ЃП на гостински терен, и сега двата најголеми ривали влегуваат во последните девет кола со израмнет број на бодови.

Спахиу, Велковски и Матиќ се заканија кај Вардар, а потоа на другата страна Гафури, но промена на резултатот немаше се до 44. минута.

Арсими дојде до водство по акција на Дардишта кој додаде до Мустафа, а овој ја упати топката во петерецот каде се најде Гони, кој го совлада Талески и донесе предност за домашните.

Во второто полувреме Вардар целосно ја имаше иницијативата, поседот на топката, но премалку концентрација во завршницата на акциите. Велковски имаше две шанси, а потоа стигна и најзрелата прилика во 77. минута кога Закариќ беше осамен на десната страна, но неговиот удар го одбрани Силјановски во корнер.

Шанси за Вардар имаа и Торес и Талевски во судиското надополнување, меѓутоа промена на резултатот немаше, па така домашните фудбалери славеа голема победа во битката за опстанок.