Вечното дерби на македонскиот фудбал меѓу најголемите имиња на зелениот терен, Пелистер и Вардар, донесе офанзивен и интересен натпревар за публиката која го исполни стадионот „Петар Милошевски“ во Битола, а во кој победата ја забележаа скопските „црвено црни“ so 1-2 (0-0).

Вардар влезе како фаворит во овој меч и ја имаше иницијативата создавајќи три изгледни шанси во првиот дел. Првата шанса дојде преку Матиќ веќе во деветтата минута, кога биеше со глава по изведениот корнер. Само две минути подоцна и Бабунски се обиде да го отвори резултатот по проигрување од Мато, додека во 22. минута шанса за Вардар имаше Тодоровски.

Потоа иницијативата на Вардар спласна и забележани се две шанси за Пелистер, при што првата во 26. минута преку Белиќ кој биеше од преку 20 метри, а втората во судиското надополнување од првиот дел, кога Булатовиќ од слободен удар изнуди принудна интервенција на Талески.

Вториот дел донесе „оган на теренот“ и подигање на емоциите и кај играчите и кај публиката. Во 53. минута, Мато конвертираше во гол прекрасна асистенција од надворешаната страната на шеснаесетникот, казнувајќи ја одбраната на битолчани која не успеа да изблокира како дотогаш.

Пелистер и понатаму се обидуваше со удари од далечина, па во 59. минута Спировски од 25 метри биеше прецизно, Талески боксуваше во височина, а Петар Петковски влезе во казнениот простор и реализираше за израмнување. Судијата Грујовски на барање од вардарци побара асистенција од ВАР собата дека немало офсајд, по што голот беше потврден.

Најубавата, но нереализирана шанса за Вардар ја имаше Омерагиќ во 68. минута, по уште едно прекрасно проигрување, но топката му отскокна пред нога и не успеа да ја скроти и упати во мрежата на Јовчевски. Сепак, во 80. минута Данев иако се тетеравеше уште од надвор од шеснаесетникот, успеа да измами реакција од одбраната на Пелистер и да биде соборен во казнениот простор, по што беше досуден пенал за Вардар. Сигурен реализатор беше Закариќ во 83. минута.

Финишот беше подеднакво жесток, при што Вардар дојде до нова шанса преку Данев од левата страна, кој истрча во лево и упати непрецизен шут кон голот на Јовчевски, додека на спротивната страна Мирко Ивановски не успеа да стопира една отскокната топка по играта со глава од Ристевски. Капитенот на битолчани беше во преден план и кога после пробивот од десна страна бараше пенал поради игра со рака од одбранбениот играч на Вардар, како и во финишот за една повратна топка до Талески, но во двата случаја судијата Грујовски само покажа два жолти картони, заради реакциите на Спировски и Ивановски.

Вардар останува единствена непоразена екипа по 12. коло и со 30 бода се враќа на лидерската позиција, додека Пелистер може да жали за пропуштен бод, кој ќе му значеше во борбата за опстанок, бидејќи сега има само 8 бода и е во опасната зона, на 10 место од табелата.

По само четири дена, Пелистер во Битола ја пречекува Брера.

Ханзи Флик јавно ги отфрли последните шпекулации во медиумите за можен замин од клубот во 2026 година. Германскиот стратег, кој игра клучна улога во обновата на клубот, ги оцени гласините како „само уште една глупост“ и истакна дека длабоко го сака клубот, играчите и сè што го опкружува.

„Навистина го сакам овој клуб, ги сакам играчите и сè што е поврзано со него“, рече Флик, нагласувајќи ја својата посветеност и задоволство од работа во Барселона.

Тој додаде и дека е среќен на Камп Ноу: „Многу сум среќен во Барселона“, со што се обиде да ја смири јавноста и фановите, во време кога се појавија различни шпекулации за неговата иднина.

Со оглед на важноста на неговата улога и времетраењето на неговиот договор, кој според медиумите се протега до 2026 или 2027 година, коментарите на Флик ја потврдуваат неговата посветеност на стабилноста и успехот на клубот.

На натпреварот меѓу Ливерпул и Реал Мадрид, Трент Александер Арнолд беше пречекан со освиркувања и навредливи извици од дел од домашните навивачи. Џуд Белингам јавно го поддржа, оценувајќи дека реакциите на трибините не ја одразуваат вистинската слика за чувствата на навивачите кон поранешниот миленик на клубот.

„Тоа не беше омраза, туку дел од обидот да се изврши притисок и да се добие предност на теренот,“ изјави Белингам, додавајќи дека Трент секогаш покажувал огромна почит кон Ливерпул и неговите фанови.

Освен освиркувањата, на неколку места околу стадионот биле забележани и вандализирани мурали со ликот на Александер Арнолд, сцени што го обележаа неговото прво враќање на Енфилд како играч на Реал Мадрид.

Белингам нагласи дека таквите моменти се дел од фудбалот и дека вистинските љубители на клубот го ценат Трент за сè што направил. „Тој даде многу за Ливерпул и секогаш ќе биде почитуван таму,“ изјави Белингам

Некои од спортските аналитичари и медиуми се согласија со ставот на Белингам, посочувајќи дека емотивните реакции на навивачите се неизбежен дел од играта. Сепак, тие потсетија дека Александер Арнолд останува еден од најценетите играчи што произлегле од академијата на Ливерпул.

Милан и Интер добија тапија за сопственоста на „Сан Сиро“ стадионот и околните објекти, лутите ривали сега ќе можат да изградат нов стадион, кој се очекува да биде готов до 2031 година.

Интер и Милан и официјално се „газди“ на „Сан Сиро“, попладнево беа потпишани сите документи и двата клуба добија тапија за сопственоста на стадионот и околните објекти.

На лутите ривали им се брзаше да стават потпис на документите пред 10. ноември, бидејќи тогаш на сила стапуваат архитектонските ограничувања за вториот „ринг“ и тоа ќе значеше дека објектот не би можел да урне.

Инвестицијата е вредна околу 197 милиони евра, сума која ќе биде платена на неколку рати.

Интер и Милан сега ќе продолжат со проектот за изградба на нов стадион со капацитет од 71.500 гледачи, градежните активности треба да започнат на почетокот од 2027 година и да финишираат до 2031 година.

Сегашниот „Сан Сиро“ ќе биде делумно зачуван и наменет за музеј и комерцијална употреба.

Шкотскиот великан, фудбалскиот клуб Селтик сè уште нема менаџер. Тој го има в.д. менаџерот Мартин О’Нил, но раководството на шкотскиот шампион не може да најде постојан тренер, бидејќи досега тројца стручњаци ја одбиле нивната понуда.

Се очекуваше дека Ангелос Постекоглу ќе се врати на клупата откако беше отпуштен од Нотингем Форест, но Австралијанецот го одби поранешниот клуб со оправдување дека сакаат да одмори до крајот на сезоната.

Понудата потоа била испратена до Марк Ван Бомел, поранешниот тренер на ПСВ, Волфсбург и Антверпен. Поранешниот холандски ас има други планови, па затоа категорично ја одбил понудата од Глазгов.

Британскиот јавен сервис „Би-Би-Си“ истакнува дека и Крег Белами ја одбил понудата. Селекторот на Велс е посветен на квалификациите за Светското првенство и не сака да го преземе клубот бидејќи се надева дека „змејовите“, во март наредната година ќе играат во плејофот за пласман на Мундијалот.

Џенова ќе го назначи Даниеле Де Роси за нов тренер, објавија денес италијанските медиуми.

„Фудбал Италија“, објави дека Де Роси ќе потпише договор до крајот на сезоната, со опција за продолжување на соработката доколку тимот избори опстанок во Серија А.

Де Роси ќе го предводи тимот во претстојниот првенствен натпревар против Фиорентина во недела.

Управата на Џенова не сакаше да го одложи назначувањето на новиот тренер, туку да го ангажира пред паузата во првенството.

Исто така, раководството реагираше брзо бидејќи очекуваше Де Роси да добие понуда од друг клуб.

Џенова го отпушти тренерот Патрик Виеира на 1 ноември откако тимот не победи на ниту еден натпревар во првите девет кола од Серија А.

Оттогаш, тимот го предводеа Роберто Мургита и Доменико Кришито, а во понеделник, Џенова ја оствари својата прва победа во лигата, против Сасуоло со 2:1 и се искачи на 18-то место на табелата со шест бода.

Во искрен разговор во неодамнешно интервју, Кристијано Роналдо изрази длабока тага за сегашната состојба на Манчестер Јунајтед, клуб кој, како што вели, „засекогаш останува во неговото срце“.

„Манчестер Јунајтед е еден од најголемите клубови во светот, но реалноста е дека оваа сезона нема да ја освојат Премиер Лигата веќе заостануваат премногу,“ изјави португалската ѕвезда.

Роналдо укажа дека клубот моментално нема јасна структура ниту долгорочен план. „Јунајтед во моментов нема вистинска организација. Се надевам дека тоа ќе се промени, затоа што клубот го заслужува тоа,“ рече тој.

Тој нагласи дека успехот не зависи само од фудбалерите или тренерот, туку од паметно и визионерско раководство кое ќе ја врати културата што го направи клубот голем.

„На Јунајтед му се потребни паметни и чесни луѓе кои ќе го изградат идниот пат на клубот, како што тоа се правеше во златните години,“ истакна Роналдо.

Тој додаде дека првиот чекор кон напредок е искрената самокритика: „Мора да признаат дека клубот не е на добар пат.“

Роналдо му даде поддршка на актуелниот тренер Рубен Аморим, но и реална проценка: „Аморим се труди, но што може да направи? Чуда не постојат.“

Иако смета дека составот има квалитет, Роналдо верува дека дел од играчите не го разбираат вистинското значење на дресот што го носат. „Некои не знаат што претставува Манчестер Јунајтед,“ рече тој.

И покрај критиките, Роналдо ја потврди својата приврзаност кон клубот: „Манчестер Јунајтед секогаш ќе биде дел од мене. Го сакам клубот.“

Неговите зборови, исполнети со искреност и грижа, веројатно ќе одекнат меѓу навивачите и ќе го зголемат јавниот притисок за вистинска промена на Олд Трафорд.

Феде Валверде во следните 24 до 48 часа ќе биде подложен на лекарски прегледи, откако почувствувал непријатност и знаци на замор. Уругваецот откри дека се консултирал со лекарскиот тим на клубот, кој проценил дека е потребна детална проверка за да се утврди причината за неговата физичка состојба.

Последниве недели Валверде одигра голем број натпревари без многу одмор, што предизвика загриженост меѓу навивачите и стручната јавност. Интензивниот ритам на сезоната очигледно го оставил својот белег, па клубот сега пристапува внимателно кон ситуацијата.

Од Реал Мадрид порачаа дека ќе ја следат состојбата на фудбалерот во наредните денови, а исходот од медицинските тестови ќе одреди дали тој ќе биде подготвен за претстојните натпревари. Целта е Валверде целосно да се опорави пред да се врати на тренинзите и натпреварите.

Фудбалската јавност беше шокирана поради тешката повреда на Ашраф Хакими за време на натпреварот меѓу Пари Сен Жермен и Баерн Минхен во Лигата на шампионите. Мароканскиот бек, еден од клучните играчи на ПСЖ, со солзи го напушти теренот по груб прекршок од Луис Дијаз, кој по ВАР преглед доби директен црвен картон.

Дијаз, кој претходно постигна два гола и му донесе водство на Баерн, го остави својот тим со играч помалку по опасниот старт врз Хакими. Инцидентот целосно ја смени динамиката на натпреварот, кој заврши со победа од 2-1 за германскиот тим, но вниманието беше насочено кон повредата на мароканската ѕвезда.

Според првичните информации, се стравува дека Хакими добил сериозна повреда на зглобот што би можела да го извади од терените до крајот на сезоната. Тоа претставува огромен удар не само за ПСЖ, туку и за репрезентацијата на Мароко, која во декември ќе игра во Африканскиот куп на нации.

Капитенот на Мароко неодамна изјави дека сонот му е да го освои трофејот пред домашната публика, па неговото веројатно отсуство е големо разочарување за навивачите и соиграчите.

Сцените на неговото емотивно излегување од теренот уште еднаш потсетија колку тежок може да биде спортот, и физички и психички. Светските медиуми и љубителите на фудбалот сега со нетрпение чекаат официјални информации за сериозноста на повредата и времето потребно за негово закрепнување.

Фудбалската ѕвезда и актуелен освојувач на Златната топка, Усман Дембеле, доживеа нова повреда само 25 минути по почетокот на дуелот меѓу Пари Сен Жермен и Баерн Минхен во Лигата на шампионите. Францускиот репрезентативец, кој штотуку се врати на терените по повреда на задната ложа во септември, беше принуден повторно да го напушти мечот предвреме.

Неговата фрустрација беше уште поголема откако непосредно пред замената, неговиот гол беше поништен поради минимален офсајд по преглед на ВАР. Дембеле веднаш замина во соблекувалната придружуван од медицинскиот тим на ПСЖ, оставајќи ги навивачите во неизвесност околу тежината на новата повреда.

Иако тренерот Луис Енрике уверуваше дека 28-годишниот крилен напаѓач е целосно опоравен и подготвен за натпревар, последните случувања повторно ги разгореа сомнежите околу неговата физичка издржливост. Според првичните информации, повредата не е директно поврзана со претходната, но ќе бара дополнителни прегледи во наредните денови.

Новата несреќа доаѓа во тежок момент за Пари Сен-Жермен, кој веќе се соочува со повеќе повредени играчи во нападот, меѓу кои и младиот Дезире Дуe.

Клубот сега со загриженост ќе ја следи состојбата на својот највреден фудбалер, надевајќи се дека не го очекува уште една подолга пауза.