Само дваесет часа по дуелот со Барселона во Лигата на шампионите против Барселона, првакот Еурофарм Пелистер одигра дуел од Суперлигата со Тиквеш и го совлада среде Кавадарци со 25-30 (12-15).

Пелистерци отворија подобро, погодуваа Тајник, Атанасијевиќ, Кузмановски и Валид за 1-4. Успеа домаќинот да се консолидира, па пријде до 3-5, ама бргу на семафорот се врати предноста од четири гола откако реализираа Валид и Видомски (3-7). Погоди Мартин Манасков за 5-7, а потоа гостите врзаа серија од 0-5 и се одлепија на седум разлика. Сепак, до полувремето домашните ја преполовија негативата и на одмор се замина со 12-15.

Успеа Тиквеш во второто полувреме да дојде и израмнување (18-18), но шампионот тука одново „додаде гас“ и до крајот повторно беше подобриот тим за петти триумф од стартот на сезоната

Во победничкиот табор со по пет гола се истакнаа браќата Петар и Павле Атанасијевиќ, Домен Тајник и Рудолф Хекбарт.

Во следното осмо коло, в сабота од 13:00 часот Еурофарм Пелистер го игра градското дерби со Еурофарм Пелистер 2.

Женската ракометна репрезентација на Македонија со пораз ги почна квалификациите за Европското првенство. Вечерва во Гумерзбах, нашите девојки беа поразени од Германија со 34-18 (14-8).

Иако одигравме солидно во првиот дел, во второто полувреме Германките, особено во финишот, ја зголемија разликата која на крајот не чинеше повеќе од убедлив пораз. Апсолутниот фаворит во групата уште на стартот на квалификациите потврдува дека е најголем фаворит за директен пласман на ЕП.

Емилијана Ризоска беше најдобра во нашата репрезентација со 8 гола, додека Ива Младеновска постигна четири.

Македонскиот ракометар Томислав Јагуриновски официјално потпиша договор со ГРК Охрид, враќајќи се во домашното првенство по кратка авантура во Германија.

Тој пристигна од клубот Десау, каде што настапуваше минатата сезона, но поради повреда на грбот реши да се врати во Македонија.

„Чест ми е што ќе го носам дресот на ГРК Охрид. Ова е град со голема ракометна традиција и вистински македонски бисер. Се надевам дека заедно ќе постигнеме големи работи,“ изјави Јагуриновски по потпишувањето на договорот.

Со овој трансфер, Охрид добива големо засилување на бековската позиција. Јагуриновски во минатото настапуваше за Металург, Вардар, Еурофарм Пелистер и Работник, а беше и дел од македонската репрезентација.

Тренерот Борис Ројевиќ очекува новото засилување да внесе искуство и стабилност во тимот кој оваа сезона има амбиции да се бори за пласман во горниот дел од табелата.

Ракометарите на Еурофарм Пелистер се претставија добро во дуелот со европскиот великан Барселона во ракометната Лига на шампиони, но не успеаја да обезбедат позитивен резултат на домашен терен (30-34).

Двата шпански тренери го анализираа натпреварот и се осгласија дека подобриот тим победи. Исто така беа одушевени од атмосферата и амбиентот во салата.

Рубен Гарабаја
(тренер на Еурофарм Пелистер)
Игравме против можеби најдобриот тим во светот. Да ја победиш Барселона мора да си перфектен, ние имавме добар меч, но не и перфектен. Правевме некои лесни грешки, не најдовме решение да ги сопреме во одредени ситуации. Вториот дел беше многу подобар, видов борба. Имавме мала шанса на крајот на мечот, но не можевме да победиме. Мислам дека напредуваме секој ден и сме подобри, мора да го ставиме фокусот дури и на најмалиот детал во играта. Мора да го држиме фокусот, да бидеме паметни во најситните моменти. Знам дека некогаш не е лесно да се прави тоа, но мора да работиме на таквите работи за да дојдеме до нови победи.

Карлос Ортега
(тренер на Барселона)
Беше задоволство да се игра на ваков терен пред овие навивачи, ми доаѓа пак да бидам играч во овие услови. Домашната публика навистина притиска и сите екипи сигурен сум дека ќе имаат тука проблеми. Против нас го имавме и мојот поранешен играч Филип Кузмановски, сега Кузмановски е веќе зрел играч, лидер на екипата, игра извонредно со пивот и токму тој е она што му треба на Еурофарм Пелистер. Ми беше драго што повторно го видов.

По пет одиграни гола Еурофарм Пелистер е седми во групата Б со една победа и четири порази.

Ракометарите на Еурофарм Пелистер одиграа одличен натпревар, но претрпеја пораз во Лигата на шампионите, откако вечерва загубија од повеќекратниот европски првак Барселона со 30-34 (13-17).

Битолчани беа равноправен противник против фаворитот во поголемиот дел од првиот дел, а резултатот беше нерешен девет пати до 9-9. Во тој период македонскиот првак во четири наврати имаше водство од еден гол. По 9-9 Барселона направи серија од 6-1 за водство од 10-15, што само ја навести победата на шпанскиот тим.

Во второто полувреме Барселона во неколку наврати имаше предност од +7, а во финишот битолчани намалија на 30-33, но гостинот го задржа водството.

Најефикасни на дуелот беа Дејан Манасков и Ник Хенигман од Еурофарм Пелистер со по осум голови, а кај победничката екипа Дика Мем и Домен Макуц постигнаа по шест. Голманот на Еурофарм Пелистер, Никола Митревски дуелот го заврши со тринаесет одбрани.

Во следното шесто коло следниот четврток Еурофарм Пелистер гостува кај Магдебург.

Ракометарите на Вардар со победа против Сесвете со 34-29 го започнаа патот во меѓународната конкуренција во новата сезона.

„Црвено-црните“ главно доминираа во текот на мечот против хрватскиот состав и на крајот рутинирано ги прокнижија првите бодови во групата „Ф“.

Во победничкиот тим се издвои Дмитро Хорига со 7 голови а кај гостите Златко Ражан со 9 погодоци. Вардар на 21.октомври во втората рунда ќе гостува кај Тулуз.

Македонскиот ракомет остана без познатиот спортски работник, Илија Темелковски, кој почина на 72-годишна возраст.

Тој беше екс селектор на машката сениорска репрезентација која го освои 11 место на СП во Хрватска. Темелковски имаше забележителни настапи и со младинските селекции на неколку значајни меѓународни настани.

Погребот е утре (14.10.2025) во 11:00 часот на градски гробишта Бутел.

Ракометарите на Вардар утре го имаат првиот дуел од Лига Европа, а во Скопје гостува Сесвете од Хрватска. Ова е нов предизвик за „црвено-црните“ кои имаат одличен старт во домашната лига и седум победи во исто толку натпревари.

„Вардар секогаш има победнички аспирации, без разлика каде игра. Наша желба е да стигнеме што е можно подалеку во ова натпреварување. Групата е тешка, иако имињата на ривалите не се атрактивни. Но, тоа не значи дека секој натпревар е важен, секој бод ќе биде важен. Сесвете е претставник од Хрватска, не е на нивото на Загреб или Нексе, но тоа е млада екипа од Загреб, која сака да се докажува. Македонската лига во моментов е посилна и поизедначена , за разлика од Хрватската, каде Загреб е број 1, Нексе број 2, а потоа следи Сесвете. Ние ќе се фокусираме на нашата игра и со поддршката од навивачите ќе се обидеме да „запишеме“ победа“, изјави тренерот на Вардар Иван Чупиќ на денешната прес конференција.

Натпреварот Вардар – Сесвете почнува се игра утре (вторник) со почеток во 18:45 часот. Во другиот дуел од групата играат: Тулуз и Кристијанстад.

Ракометарите на Охрид се веќе со едната нога во следната рунда од ЕХФ Европскиот Куп. „Гладијаторите“ приредија вистинска ракометна лекција за Баку и на првиот меч славеа со неверојатни 44-11.

Од самиот старт беше јасно кој е господар на теренот. Охрид поведе со 5-1, потоа зголеми на 10-3, а на полувремето веќе имаше убедливи 24-7.

Голманот Чаневски одигра меч за паметење – одбрани 22 удари и заврши со 68 % успешност, што беше дополнителен удар за азербејџанскиот тим.

Тренерот Ројевиќ во второто полувреме им даде шанса на сите ракометари, но разликата само растеше. На крајот – 33 голови предност за македонскиот претставник.

Најефикасен беше Иванковиќ со девет погодоци, додека Ојлески и Ѓукиќ постигнаа по шест. Кај гостите се истакна Мамадов со четири гола.

Реваншот кој се игра утре од 18 часот во СРЦ „Билјанини Извори“ ќе биде само формалност – јасно е дека Охрид патува меѓу најдобрите 32 екипи во ЕХФ Купот.

Македонската женската ракометна репрезентација на 19 .октомври го игра натпреварот против Словенија од квалификациите за ЕП 2026. Дуелот ќе се игра во спортската сала „Боро Чурлевски“ во Битола со почеток во 18:00 часот.
РФМ ја одреди цената за дуелот на ракометарките со Словенија во Битола

Федерацијата објави дека денеска почна продажбата на влезници за натпреварот и тоа online на интернет-страницата на МК Тикетс (https://mktickets.mk). Влезници можат да се купат и на сите продажни места на МК Тикетс низ државата. Продажната цена на влезниците за натпреварот е 100 денари.

Националниот тим подготовките ги почнува во понеделник 12.октомври, а на 16.октомври (четврток) избраничките на селекторот Кристијан Грчевски ќе играат против Германија на гостински терен.