Средниот бек на српскиот ракометен клуб Партизан, Миха Котар, од следната натпреварувачка сезона 2026/27 ќе ги брани боите на Е.Пелистер.

Во последните неколку натпревари, Словенецот беше најдобриот играч на белградските „црно-бели“.

Особено блесна во финалето на Купот на Србија во Бањица против Динамо Панчево (34:27). Иако имаше договор до јуни 2027 година, Словенецот доби дозвола од Партизан за промена на средината.

Се очекува да го замени сонародникот Домен Тајник кој по три години во „зелено-белиот“ дрес се враќа во Словенија во Слован Љубљана, сигурен учесник во Лигата на шампионите следната сезона.

Вардар 1961 од следната сезона ќе биде засилен со нов десен бек – Мохамед Абделхак.

23-годишниот Египјанец доаѓа од Кил, а претходно настапуваше и за Ним. Сезонава одигра 26 натпревари и постигна 32 гола.

Абделхак освен за Кил има играно и за Ал Ахли и за француски Ним.

Ракометарите на Охрид обезбедија пласман во полуфиналето на ЕХФ Европскиот куп откако во четвртфиналната фаза со две победи го елиминираа грчкиот Олимпијакос.

Следен предизвик за македонскиот претставник ќе биде словенечкиот тим Целје кој пак беше подобар во двомечот со Бузау од Романија.

ГРК Охрид објави дека првиот натпревар против Целје ќе го игра на 25 април во Словенија, а реваншот е закажан за 2 мај во салата „Билјанини извори“.

Во втората полуфинална пресметка од клупското натпреварување ќе играат Татабања од Унгарија на Филип Талески и Извиѓач од Босна и Херцеговина.

До првиот меч против Целје, играчите на тренерот Борис Ројевиќ ќе одиграат два меча во домашниот шампионат, на 8 април на гости против актуелниот првак Еурофарм Пелистер, а на 14 април ќе го пречекаат Тиквеш.

Ракометарите на Охрид со денешната победа против Олимпијакос со 25:24 го потврдија пласманот меѓу најдобрите четири екипи во Европскиот Куп на ЕХФ.

Во одлична атмосфера во СЦ Билјанини Извори, домаќините ја одбранија предноста од пет голови од првиот меч во Грција и ги израдуваа фановите со историски пласман во полуфиналето на едно европско натпреварување.

Во нашиот тим се издвои Анте Иванковиќ со осум голови пред Томи Јагуриновски со четири. Кај Олимпијакос, Савас постигна пет гола. Во полуфиналето на ЕХФ Купот, нареден противник на Охрид ќе биде словенечкиот состав Целје.

Ракометарите на Охрид сериозно се подготвуваат за реванш четвртфиналето од Европскиот куп. Утре во „Билјанини Изори“ гостува екипата на Олимпијакос, а охриѓани ќе бранат предност од 5 гола остварена на првиот меч. Тренерот Ројевиќ, во очекување на утрешниот дуел вели:

„Сигурно дека ништо не е готово. Гледам дека јавноста е позитивно расположена по првиот меч, но оваа предност во модерниот ракомет не мора да значи ништо. Кога се игра со брзо темпо и влогот е голем, овие пет гола можат лесно да бидат надополнети. Олимпијакос минатата сезона ја победи Турда со пет гола на гости, па загуби со четири гола на домашен терен. Имаме многу повреди, дури четворица ќе мораат да играат под лекови или со инјекција. Не тренираме толку силно како минатата недела, очигледен е заморот, но и проблемот со повредите. Не играме само за Охрид, туку и за цела Македонија, затоа што ја претставуваме државата. Имаме добар резултат, но мораме да работиме напорно за да се пласираме во полуфиналето. Немаме преголем ростер, но ќе се обидеме да пружиме силен отпор, со кој ќе ја оствариме нашата цел“, изјави Ројевиќ.

Женската ракометна репрезентација на Македонија ќе ја дочека Германија во рамките на квалификациите за ЕП.

Натпреварот од претпоследното квалификациско коло ќе се одигра во СЦ „Борис Трајковски“.

Ракометната федерација на Македонија донесе популарна одлука и реши да ги отвори вратите за сите љубители на ракометот.

Влезот за средбата против Германките ќе биде бесплатен.

Натпреварот меѓу Македонија и Германија во најголемата сала во државата ќе се одигра на 8 април во терминот од 18:00 часот.

Главниот град на Македонија за првпат ќе биде домаќин на едно од најзначајните младински спортски натпреварувања Светското училишно првенство во ракомет, кое ќе се одржи од 21 до 29 април, во организација на Федерацијата за училишен спорт на Македонија, под покровителство на Министерството за спорт.

Со овој престижен настан, главниот град ќе стане центар на светскиот младински ракомет, обединувајќи млади спортисти од повеќе земји, со цел промоција на спортските вредности, фер-плејот и меѓународното пријателство.

Свеченото отворање на првенството ќе се одржи на 21 април со почеток во 19:30 часот на Плоштад Македонија, каде ќе биде организирана богата културно-уметничка програма и дефиле на сите учесници и претставување на репрезентациите. Овој настан ќе го означи официјалниот старт на шампионатот кој ќе донесе вистинска спортска атмосфера во главниот град.

На првенството ќе учествуваат вкупно 23 машки и 16 женски екипи, односно 21 делегација од различни земји од светот, кои ќе се натпреваруваат во шест спортски сали во Скопје: СРЦ „Македонско сонце“, СРЦ „Архиепископ Доситеј“, СРЦ „Кочо Рацин“, СРЦ „Крсте Мисирков“ и СРЦ „Антон Димитров“, додека финалните натпревари, ќе се одиграат на 28 април во спортската сала „Расадник“ кога ќе се одржи и свеченото затворање на првенството. Со тоа ќе биде заокружен овој значаен спортски настан кој остава траен белег во развојот на училишниот спорт.

Во рамки на првенството, на 25 април ќе се одржи „Cultural Day“, ден посветен на културна размена, каде учесниците ќе имаат можност да се запознаат со нашето културно и историско наследство. Истата вечер ќе се реализира и „Nations Night“, настан на кој делегациите ќе ги претстават своите земји преку традиција, музика и гастрономија, поттикнувајќи пријателство и меѓусебно разбирање.

• Горди сме што Македонија ќе биде организатор на ова престижно првенство. Ракометот, како спорт со длабока традиција во Македонија, има посебно место во срцата на нашите граѓани и претставува значаен дел од нашиот спортски идентитет. Би сакала да упатам искрена благодарност Министерството за Спорт на Македонија за поддршката и до Светската федерација за училишен спорт за укажаната доверба. Македонија нема да биде само домаќин на спортско натпреварување, туку домаќин на младоста, енергијата и иднината на светот. На едно место се обединети млади спортисти од целиот свет, со различни јазици, култури и традиции, но со една заедничка вредност – љубовта кон спортот.“ – изјави претседателката на Федерацијата за училишен спорт на Македонија, Елена Мицковска.

Организацијата на ваков настан носи значајни придобивки за државата, вклучувајќи ја промоцијата на Македонија како атрактивна спортска и туристичка дестинација.

Светското училишно првенство во ракомет Скопје 2026 не е само спортски настан, туку платформа за поврзување на младите од целиот свет, размена на култури и создавање нови пријателства преку спортот.

Никола Граховац го продолжи договорот со актуелниот ракометен шампион на Македонија. Битолските „зелено-бели“ објавија дека Граховац ќе биде во дресот на Еурофарм Пелистер до 2028 година.

„Потребни ни беа само неколку натпревари да го забележиме неговиот квалитет и да констатираме дека Никола Граховац и Еурофарм Пелистер се создадени едно за друго. Затоа со задоволство ја запознаваме јавноста со новиот договор за сезоната 2026/27, со опција и за сезоната 2027/28“, објавија од клубот.

Граховац пред да дојде во Македонија настапуваше во Хрватска, Унгарија и Германија.

Ракометниот суперлигаш Бутел денес на прес-конференција ја најави соработката со новиот тренер. На клупата на РК Бутел од наредната сезона ќе седне поранешниот репрезентативец и легенда на Вардар, Столе Стоилов.

Ова ќе биде прв клуб кој ќе го води Стоилов, откако претходно беше помошник во Вардар, а воедно е и во стручниот штаб на нашата репрезентација.

Стоилов најави дека целта му е да работи со млади ракометари и да биде конкурентен за плеј оф. Неговата проценка е дека Бутел има добра програма и стратегија и затоа прифатил да седне на кормилото на оваа екипа.

„Баравме идеално и квалитетно решение за клупата на Бител Скопје. Имавме краток состанок со Стоилов и веднаш се договоривме. Станува збор за легенда не само во македонскиот ракомет туку и пошироко. Со него ќе добиеме квалитет и искуство на клупата, а во ростерот ќе имаме млади македонски играли“ рече претседателот на РК Бутел, Бојан Спасовски.

Договорот за соработа меѓу РК Бутел и Столе Стоилов е на период од две години, а ќе започне од јуни.

Македонската ракометна легенда Столе Стоилов по крајот на богатата кариера започна со тренерската работа за првпат во кариерата ќе биде и прв тренер.

Легендата на Вардар 1961 кој долги години беше дел од стручниот штаб на црвено-црните, а во моментов е без клупски ангажман, ќе седне на клупата на македонскиот ракометен суперлигаш Бутел Скопје.

Клубот од суперлигашкото друштво го води Горан Кузманоски, но тренерот заминува да гради интернационална кариера во Кипар од каде има нов клуб.

Одлуката на раководството паднала на Стоилов, кој има големо познавање во македонскиот ракомет.