Селекторот на машката ракометна репрезентација М-18 , Горан Кузманоски го објави списокот на играчи повикани за настап на ЕХФ ЕУРО 2026 кое ќе се одигра во Србија.

На списокот на селекторот Кузманоски се најдоа два голмани, четири крилни играчи, девет бека и три пивотмени.

Собирот ќе се одржи на 06.07.2026 (Понеделник ) со почеток во 17:00 часот во Спортската сала Јане Сандански ( мала сала).

На ова ЕП кое ќе се одржи во Србија, Македонија е во група заедно со Словенија, Шведска и Франција, а ќе се одржи од 29 јули до 9 август во Белград.

Кипарскиот тим Строволу и официјално го потврди доаѓањето на македонскиот ракометен стратег Горан Кузманоски.

Откако стана јасно дека Кузманоски ја завршува соработката со Бутел, екипата на Строволу беше реална опција, па денеска и официјално е потврден трансферот на нашиот селектор во младинските категории.

„Возбудени сме што го пречекуваме нашиот нов главен тренер на машката екипа, Горан Кузманоски. Горан е многу познат поранешен играч и тренер. Покрај тоа што се приклучи на СПЕ Строволу како главен тренер, тој моментално е и главен тренер на репрезентацијата на Македонија до 18 години. Неговиот тим до 18 години неодамна се пласираше во финалето на Европското првенство, кое ќе се одржи во Србија на крајот на јули и почетокот на август. Добредојдовте во семејството на СПЕ Строволу, тренеру Горан!“, напишаа од клубот.

Македонската репрезентативка Марија Јанкуловска направи голем чекор во кариерата и следната сезона ќе настапува во француското првенство.

Дваесетгодишната ракометарка потпиша за Париз 92 и за првпат ќе се испроба надвор од Македонија. Јанкуловска во изминатиот период беше дел од Ѓорче Петров, со кој ја освои двојната круна во домашниот шампионат.

„Многу сум возбудена што се приклучувам на Париз 92 и што започнувам ново поглавје. Едвај чекам да се запознаам со сите и да почнеме со работа“, порача Јанкуловска по потписот за францускиот клуб.

Левиот бек својата кариера ја започна во Пелистер, настапуваше и за Металург Автокоманда, а добрите игри во клубот и репрезентацијата ѝ донесоа трансфер во една од најсилните европски лиги.

Кжиштоф Лијевски е официјално нов тренер на полскиот ракометен гигант, Кјелце.

Новиот тренер беше веќе претставен од клубот и доаѓа како замена за легендарниот Талант Дујшебаев.

Лијевски работеше како привремен тренер откако замина Дујшебаев, а сега ја доби целосната доверба од клупската управа, која од него ќе очекува добри резултати во домашни и меѓународни рамки.

Пред само неколку недели се закити со шампионската титула во домашното првенство, што беше јасен знак за управата дека поседува квалитет за клупата на славниот полски тим. Договорот е со важност до 2028 година.

Новата ракометна сезона 2026/27 во македонската Суперлига ќе започне на крајот на летото, а веќе е позна календарот за целата сезона. Во првото коло двата битолски клуба, Еурофарм Пелистер и Еурофарм Пелистер 2 гостуваат.

Вака изгледаат паровите од првото коло.

Суперлига 2026/27
Прво коло:
Бутел Скопје – Младост Богданци
Пролет – Тиквеш
Прилеп – Куманово
Охрид – Еурофарм Пелистер
Вардар – Еурофарм Пелистер 2
Алкалоид – Мулти Есенс

Наскоро ќе биде обелоденет целиот распоред од нашата елитна категорија.

Еурофарм Пелистер објави дека нов играч на клубот е Алекса Колаковиќ кој стави потпис на договор до крајот на сезоната со опција да биде продолжен за уште една година.

Пелистер го реновира тимот кој во наредната сезона има амбиција да ја врати шампионската титула во Битола.

„Мозаикот за сезоната 2026/27 го комплетираме со доведување на уште еден среден бек. Нов член на Еурофарм Пелистер е Алекса Колаковиќ, кој се обврза на договор на една сезона, со опција за уште една. Се работи за 28-годишен српски репрезентативец, роден во Подгорица, кој доаѓа во Битола од францускиот ракомет.

По четири сезони во Сант-Рафаел и две во Шартр, Колаковиќ го прифати предизвикот да дојде во најракометниот град и да игра пред најдобрата публика во светот. Средниот бек има шест настапи за српската репрезентација, а настапите во една од најсилните лиги во светот беа добра препорака за трансфер во Битола“, стои во соопштението на Пелистер.

Србинот е деветто засилување за новиот тренер Лино Червар по: Серафимов, Котар, Мехмедовиќ, Џелетовиќ, Татар, Белистојаноски, Басанесе и Џелиловиќ.

Мануел Штрлек, повторно ќе го облече дресот на Загреб, откако по цели четиринаесет години се врати во клубот каде што ја започна својата кариера.

Легендарното лево крило зад себе има богата кариера, во која настапуваше за европски гиганти како Келце и Веспрем, со кои освои бројни титули, вклучувајќи го и трофејот во Лигата на шампиони во 2016 година.

Во последниот период Штрлек настапуваше за Нексе Нашице, од каде замина на позајмица во Фуксе Берлин, каде стигна до титулата во Бундеслигата и играше финале во Лигата на шампионите.

Неговото искуство во елитното европско натпреварување е импресивно – дури 17 сезони во Лигата на шампионите, со личен рекорд од 75 голови во една сезона, поставен со дресот на Веспрем.

Во репрезентацијата на Хрватска, Штрлек има 160 настапи и речиси 600 голови, а дури трипати беше избран во идеалниот ти

Еурофарм Пелистер ја заврши една од најважните задачи пред стартот на новата сезона, откако обезбеди продолжување на соработката со капитенот Филип Кузмановски.

Македонскиот репрезентативец ќе остане дел од битолскиот состав и во наредната сезона, иако во изминатиот период имаше интерес и понуди од неколку странски клубови. Сепак, Кузмановски донесе одлука да остане во Битола и да продолжи да го предводи тимот како капитен.

Средниот бек неодамна настапуваше како позајмен играч за Кувајт Клуб, со кој учествуваше на Азискиот шампионат, но по завршувањето на обврските се враќа во редовите на „зелено-белите“.

За Кузмановски ова ќе биде трета сезона по враќањето во Битола во 2023 година. Неговата кариера го одведе низ повеќе клубови, откако во 2015 година го напушти матичниот клуб и настапуваше за Металург, Еурофарм Работник, а потоа и во Германија каде ги бранеше боите на Магдебург, Хановер и Вецлар.

Битолчани подготовките за новата сезона ќе ги стартуваат во текот на јули, а тимот ќе го предводи новиот тренер Лино Червар, кој по долго време повторно се враќа на македонската ракометна сцена.

Интернационалната ракометна федерација (ИХФ) денеска ги одреди термините за Светското првенство во машка конкуренција кое во јануари ќе се одржи во Германија.

Македонија е во групата Х заедно со селекциите на Исланд, Бахреин и Јапонија. Натпреварите ги играме во Магдебург, во „ГЕТЕК Арена“.

Македонските ракометари првиот меч ќе го одиграат на 15 јануари против Јапонија од 18 часот.

Два дена подоцна е дуелот со Бахреин кој ќе се игра исто така од 18 часот.

Последниот меч од оваа фаза го играме против Исланд на 19. јануари, тој дуел е со термин од 20:30 часот.

Првите три селекции од групата одат во главната рунда.

Вардар е меѓу 27-те екипи кои аплицираа за учество во машката Лига на шампиони за сезоната 2026/27, потврди Европската ракометна федерација. Од пријавените, 21 екипа доаѓа од држави со фиксно место во натпреварувањето, а рангирањето на федерациите се базира на резултатите од претходните три сезони (2022/23, 2023/24 и 2024/25).

Меѓу земјите со фиксно место се Германија, Шпанија, Франција, Данска, Полска, Унгарија, Романија, Португалија, Хрватска и Норвешка. Шампионите на овие нации имаат автоматско место, додека дополнителни 10 екипи од седум од нив поднеле барања за учество од ЕХФ Европска лига. Секоја федерација може да побара до две дополнителни места, но вкупниот број на екипи по федерација е ограничен на максимум три.

Останатите шест екипи се од земји без фиксно место, меѓу кои е и Вардар. Од сезоната 2026/27, системот на играње се проширува на 24 екипи, поделени во шест групи по четири. Сите барања ќе бидат разгледани од евалуациска група составена од ЕХФ, ЕХФ Маркетинг и претставник на Форум Клуб Хендбол, а конечната одлука ќе ја потврди Извршниот комитет на ЕХФ.

Одлуката за учесниците ќе биде објавена во понеделник, 22 јуни, неколку дена пред ждрепката за групната фаза, која ќе се одржи на 26 јуни во Виена.