Еурофарм Пелистер 2 се избори за победа од 22-26 на гостувањето кај Струга во натпреварот од единаесеттото коло во македонската ракометна Суперлига.

По првите триесет минути битолчани имаа предност од еден гол (11-12), а неизвесната игра продолжи и во второто полувреме, иако гостите постојано беа во водство од два до три гола. Стружани побараа тајм-аут во 47. минута при резултат 17-20 во корист на гостинот, но предноста на битолчани не се намалуваше. Времето изминуваше, пелистерци не дозволуваа лесен пристап кон својот гол и уште повеќе ја зголемија разликата, па така на крајот успеаја да го заокружат петтиот сезонски триумф и славеа со конечни 22-26.

Најдобар поединец во победничкиот тим беше Одифред Баптист со осум голови, а на спротивната еден гол помалку имаше Ненад Костески.

Следниот викенд во 12. коло на Суперлигата, Еурофарм Пелистер 2 ќе го пречека Прилеп.

Ракометарите на Еурофарм Пелистер забележаа рутински и убедлив триумф над Куманово со 45-20, во натпреварот од 11. коло во Суперлигата.

Бранителот на пехарот немаше никакви проблеми со претпоследниот тим на табелата и го разби со 25 разлика. „Зелено-белите“ уште во првиот дел ги решија сите дилеми околу победникот ако воопшто некој ги имаше, го добија овој период со 20:8 за да по одморот бидат уште поефикасни, подобри и го докрајчат противникот.

Кузмановски и Атанасијевиќ дадоа по седум гола, Цековски и Стојков пак имаа по четири реализации кај поразената екипа.

Во следното 11. коло Еурофарм Пелистер ќе го пречека Бутел Скопје.

Подготовките за Европското првенство (ЕП) за ракометари во 2028 година добиваат на интензитет низ Шпанија, Португалија и Швајцарија, а една идеја се издвојува како потенцијална пресвртница за спортот.

Станува збор за организирање ракометен натпревар на легендарниот фудбалски стадион „Сантијаго Бернабеу“ во Мадрид. За време на неодамнешните посети на локациите во Шпанија и во Португалија, претставници од Европската ракометна федерација (ЕХФ) посетија неколку потенцијални места, вклучувајќи го и реновираниот стадион „Сантијаго Бернабеу“, пишува ракометниот портал „Хандбал планет“.

Со својот подвижен покрив, модерна инфраструктура и флексибилен дизајн, стадионот „Сантијаго Бернабеу“ еволуира во вистинска повеќенаменска арена способна да биде домаќин на големи меѓународни настани.

Доколку биде избран, стадионот во Мадрид би можел да обезбеди невидена сцена за отворањето на натпреварот на континенталното првенство во 2028 година, внесувајќи го ракометот во нова ера на видливост и глобална привлечност.

Домаќинството на натпревар на стадионот „Сантијаго Бернабеу“ не само што би ја симболизирало амбицијата на спортот туку би можело да го собори и постојниот рекорд за посетеност на ракометен натпревар. Актуелниот рекорд е поставен во Диселдорф (Германија) на Европското првенство во 2024 година, со над 53.586 гледачи, а во 2028 година тој рекорд би можел да биде значително надминат, оти стадионот „Сантијаго Бернабеу“ има капацитет за над 80.000 гледачи.

Заедничката организација меѓу Шпанија, Португалија и Швајцарија за Европското првенство во 2028 година веќе ветува иновација и обем.

Потенцијалното вклучување на стадионот „Сантијаго Бернабеу“ би му додало единствена димензија од светска класа на настанот, поврзувајќи го ракометот со емоциите и големината традиционално резервирана за најголемите настани во фудбалот, пишува „Хандбал планет“

Првакот Еурофарм Пелистер има причини за задоволство. Го победи Прилеп и пак на теренот се вратија повредените Хаидарирад и Ристевски, Битолчани славеа убедливо на гостувањето кај Прилеп со 25-40 (12-21), во натпреварот од десеттото коло на Суперлигата.

Почетокот беше израмнет, домашните први поведоа, ама реакцијата беше брза и гостите стигнаа до 2-4. На тоа домаќинот имаше одговор, со 3-0 успеа пак да поведе со 5-4, ама тоа беше последна предност. Пелистерци се консолидираа, го презедоа приматот и до полувремето предноста почна да расте. Со три мини-серии од по 0-3 битолчани се одлепија, па на одмор се замина со 12-21.

На отворањето на вториот дел првпат беше пробиена двоцифрената маргина (12-22). Прилепчани успеаја да парираат уште десетина минути, најблизу пријдоа на „минус шест“ (17-23) по серија од 4-0, ама тоа беше сè. Пелистерци се наметнаа, влегоа во посакуван ритам и до крајот рутински го решија мечот во своја корист. На крајот шампионот победи со високи петнаесет разлика.

Петар Атанасијевиќ со седум и Мирче Калајџиовски со шест гола беа најефикасни кај Еурофарм Пелистер. В сабота од 17:00 часот тимот на Рубен Гарабаја го пречекува Куманово во единаесеттото коло.

Мартин Томовски блеска во редовите на Битигхајм во Втората Бундеслига. Македонскиот голман брани во врвна форма од почетокот на сезоната, а моментално тој е најдобар голман во лигата.

На социјалните мрежи 2. Бундеслига објави информации за голманите, па таму на врвот котира Томовски. Македонецот има најмногу одбрани во тековната сезона, дури 102 во првите девет кола на шампионатот.

Моментално тој има четири интервенции повеќе од второпласираниот паскал Бохман.

Мартин Томовски е голман со најголем процент на одбранети удари во 2. Бундеслига.

Македонскиот голман има 34% одбрани, а по него следува пак Бохман со 33%, па Амбросуис со 32%, а по 31% имаат Плауе и Ван дер Мерве. Во оваа статистика се бројат само голманите со над 30 одбрани во лигата.

Македонската ракометна репрезентација загуби од Јапонија (31-32) во вториот пријателски натпервар на оваа ЕХФ седмица.

Азискиот ривал покажа брза игра која на моменти беше проблем за нашата селекција.

По мечот во Куманово даде капитенот Филип Кузмановски.

„Во овој момент Јапонија беше најдобар можен противник. Тие играат многу брз ракомет, а моментално во Европа и светот ова е ракометот игра на брз центар и контра веднаш по примен гол. На овие два меча кои ќе ги анализираме не бевме комплетни и имаме што да покажеме. Сепак, ова е насоката во која треба да движи Македонија. Ова е прв чекор кон Европското првенство за тешката група. Имаме доволно материјал за анализра, па иако не сме среќни со поразот покажавме доста добри работи. Ќе се поправиме сигурно, а со попрецизна и пофокусирана игра оваа Македонија на ЕП ќе биде многу подобра“, изјави Кузмановски.

Македонија следниот собир ќе го има во декември кога ќе ги стартува подготовките за Европското првенство. На континенталниот собир избраниците на Кирил Лазаров ќе играат во група во Хернинг со домаќинот Данска, Португалија и Романија.

Ракометната федерација на Македонија вечерва на гала вечера организирана во хотелот „Хилтон“ во Скопје ги избра најдобрите за сезоната 2024/2025 година. За најдобар македонски ракометар е избран Филип Кузмановски од Еурофарм Пелистер, додека признанието за најдобра кај дамите го доби Катерина Дамјановска од Ѓорче Петров.

Церемонијата почна со громогласен аплауз за прерано починатите Александар Јовиќ и Илија Темелковски. Исто така, Темелковски постхумно е добитник на наградата за посебен придонес во ракометот, за сето она што го стори за овој спорт во својот живот, најпрвин како играч, а потоа и како тренер и селектор. Големото признание на бината го прими сопругата на Темелковски заедно со неговите двајца внуци.

Признанија за најдобрите за сезоната 2024/25:
Најдобар ракометар и ракометарка: Филип Кузмановски и Катерина Дамјаноска
Најдобар тренер во машка и женска конкуренција: Кирил Лазаров и Симе Симовски
Најдобар млад ракометар и ракометарка: Димитар Узунчев и Марија Јанкуловска
Најдобри странци: Дмитро Хориха и Ана Вранчиќ
Најдобри стрелци: Давид Димевски и Марија Анчева
Најдобар ракометар и ракометарка (социјални мрежи): Никола Митревски и Теодора Гулицоска
Најдобри судии: Ѓорѓи Начевски и Славе Николов

Лазаров: Јапонците играат речиси совршен ракомет, попладнево заслужено победија

ајдобрата машка ракометна репрезентација на Македонија е поразена од Јапонија во вториот контролен натпревар, а во рамките на ЕХФ неделата. Откако пред два дена во Скопје, зад затворени врати, Македонија славеше со 29:27, денеска пред кумановската публика загуби со 31-32.

Селекторот Кирич Лазаров по натпреварот во Куманово рече:

„Сакам да кажам дека имавме екстра квалитетен противник за тестирање пред Европското првенство и самите се уверивте во нивниот квалитет. Се одигра натпревар во висок ритам сите шеесет минути, а Јапонците покажаа дека играат речиси совршен ракомет без разлика на своите физички предиспозиции. Еден натпревар победивме, а сега загубивме. Се обидов да ги освестам момците дека ова е сериозна репрезентација која секогаш игра на Олимписки игри. Со самото тоа што ќе се погледнат имињата на кој е или бил селектор докажува дека вложуваат и сакаат да одат напред. Можам слободно да кажам дека дури и заслужено победија според прикажаното”.

Пријателските дуели со Јапонците се дел од подготовки за настап на Европското првенство што ќе се одржи во јануари следната година. Селекторот Лазаров преку овие натпревари се стреми да го изгради најдобриот можен состав за континенталниот собир.

Македонската машка ракометна репрезентација загуби од Јапонија со 31-32 во вториот пријателски натпревар одигран во Куманово. Ова беше втор дуел, по првиот затворен натпревар одигран во Скопје на 30 октомври, кој Македонија го доби со 29-27.

Во еден динамичен, израмнет дуел гостите од Азија излегоа како победници на оваа втора контролка на двете селекции со тоа што првата беше затворена за јавноста и истата им припадна на избраниците на Кире Лазаров.

Двете репрезентации имаа свои моменти, минути на пресметката со Куманово, ние успеавме да го добиеме првиот дел со 17-16, меѓутоа „самураите” одговорија во вторите 30 минути, направија серија по кои македонските ракометари потоа бркаа, се обидуваа да останат барем непоразени, но тоа не го остварија иако го имавме последниот напад преку Кузмановски.

Најефикасни во македонската репрезентација беа Серафимов со седум и Костески со пет гола, а кај Јапонија се истакна Енамото со седум погодоци.

Македонската ракометна репрезентација ја отвори серијата контролни натпревари со победа над Јапонија. Избраниците на селекторот Кирил Лазаров славеа триумф со резултат 29-27 на дуелот одигран во салата во Автокоманда, кој беше од затворен тип. Во натпреварот, кој беше искористен за тестирање на формациите и ротации, Лазаров и јапонскиот селектор Тони Џерона имаа можност да комбинираат и да ги испробаат сите играчи на кои ќе сметаат во продолжението на подготовките.

Вториот пријателски натпревар Македонија и Јапонија ќе го одиграат во сабота, на 1 ноември, во Куманово, со почеток во 16:00 часот. Овие два дуела се дел од подготовките за Европското првенство 2026, кое ќе се одржи во Данска, Шведска и Норвешка. Македонскиот национален тим ќе игра во група со Данска, Португалија и Романија, противници кои ќе бидат сериозен тест за нашите ракометари.

Селекторот Лазаров истакна дека е задоволен од пристапот и ангажманот на ракометарите и најави дека вториот натпревар ќе биде искористен за дополнително усовршување на одбраната и транзицијата.