Легендарниот италијански тренер, Антонио Конте, зборуваше за шпекулациите дека наскоро се враќа на работното место, поточно, дека е опција за Манчестер Јунајтед.

Иако не го именуваше англискиот клуб, од неговата изјава е јасно дека се повикува на Јунајтед, откако неколку англиски медиуми објавија дека има нереални барања, за да ја прифати понудата.

Конте, со својата објава стави крај на шпекулациите.

„Моето име се поврзуваше со бројни клубови, но во моментов нема преговори кои се во напредна фаза. По прекрасниот и успешен период на клупата на Наполи, ќе одвојам време што ми е потребно да размислам како и кога да се вратам на тренерската работа. Тоа ќе биде внимателно донесена одлука, која ќе ја донесам кога ќе верувам дека се исполнети вистинските услови“, рече Конте и продолжи:

„Ги прочитав наводите за финансиските барања и барањето целосна контрола, кои наводно веќе им ги презентирав на гореспоменатите клубови, како и резервите во врска со она што е опишано како моја „силна личност“. Овие наводи се неосновани, бидејќи во моментов нема конкретна основа за такви проценки. Доколку се појави конкретна можност, тогаш ќе биде време за разговори со дотичниот клуб и заедничко разгледување на условите за потенцијален договор, со должно внимание на потребите на двете страни, како и квалитетот и пристапот што ја карактеризираат мојата работа како тренер. Дотогаш, сите претпоставки за моите барања и мојата професионална иднина остануваат на ниво на шпекулации и не можат да се сметаат за факти“, заклучи Конте.

Светската фудбалска федерација (ФИФА) објави дека финалето на Интерконтиненталниот куп ќе се одржи во среда, 16 декември, на стадионот „Ахмад бин Али“ во Доха.

Пари Сен Жермен, европскиот шампион и бранител на титулата, на тој начин ќе се сретне со победникот на „Челенџер купот“ на 16 декември.

На 9 декември, мексиканска Толука ќе се сретне со јужноамериканските шампиони (аргентинскиот Естудијантес или бразилскиот Палмеирас) во „Дерби Америка“.

Победникот од тој дуел ќе игра против Мамелоди Сандаунс во „Челенџер купот“ на 12 декември. Победникот од дуелот на 12 декември ќе му се спротивстави на ПСЖ во финалето.

Борнмут стана првиот англиски клуб од 1973 година наваму што ги добил првите три натпревари во голем европски клупски турнир. Историскиот успех дојде во дебитантската европска сезона на тимот, со убедливата победа од 3-0 над Милан во третото коло од Лига Европа.

Фудбалерите на Борнмут поведоа во осмата минута со голот на Џастин Клајверт од пенал. Во 28. минута голманот на Милан, Мајк Мењан, доби директен црвен картон, а Маркус Таверние ја искористи новата пенал-ситуација за зголемување на предноста. Конечниот резултат го постави Амин Адли во 84. минута, со прекрасен погодок од слободен удар.

Борнмут сега има максимални девет бода од три натпревари и се наоѓа меѓу водечките екипи во Лига Европа. Милан, седумкратниот европски шампион, досега оствари само една победа во трите натпревари од натпреварувањето.

Напаѓачот на Јувентус, Ник Волтемаде, се запиша во клупската историја, откако постигна гол на секој од првите три натпревари во европските клупски натпреварувања со торинскиот гигант. Со тоа, Германецот им се придружи на легендарните Роберто Баџо и Дарко Ковачевиќ, кои претходно го оствариле истиот подвиг во 1990, односно 1999 година.

Волтемаде беше еден од најдобрите поединци во ремито 2:2 против Рен во Лига Европа. Тој асистираше за првиот гол на Мехмет Зеки Челик, а потоа погоди и од пенал. Германецот имаше и уште една голема можност, но противничкиот дефанзивец Кресвел ја исфрли топката од гол-линијата.

И покрај тоа што има 198 сантиметри, Волтемаде се истакнува со техника и креативност, играјќи повлечено зад напаѓачот. Сепак, сè уште го чека првиот гол во Серија А, каде што ќе се обиде да ја пренесе европската форма.

Силекс ја продолжи победничката серија и освои значајни три бода во пресметката со Шкендија Арачиново, совладувајќи го противникот со 2:0. Херој на кратовскиот прволигаш беше Есмир Хасукиќ, кој по еднаш погоди во двете полувремиња.

Домашниот состав уште на самиот почеток најави дека сака да ги освои бодовите. Во третата минута, Делимеѓац испрати центаршут од десната страна, а Хасукиќ одлично реагираше со глава и ја затресе мрежата на Столевски за рано водство на Силекс.

По почетниот гол, темпото на играта малку опадна, а Шкендија Арачиново се обиде да дојде до израмнување. Најдобрата можност во првиот дел ја имаше Симоновски, но голманот Џеков беше на висината на задачата и го одбрани неговиот удар.

Прашањето околу победникот беше решено во 52. минута, кога Хасукиќ повторно се запиша меѓу стрелците. По акцијата на кратовци, Тимовски го проигра напаѓачот, кој излезе очи в очи со Столевски и реализираше. Првично беше сигнализиран офсајд, но по проверката со ВАР беше потврдено дека погодокот е регуларен за 2:0.

Силекс имаше можности и за поубедлива победа. Делимеѓац се закани од слободен удар, но Столевски интервенираше, додека обидот на Манојлов заврши покрај голот.

И гостите од Арачиново се обидоа да го ублажат поразот, но Џеков со неколку сигурни интервенции не дозволи промена на резултатот.

Со овој триумф, Силекс го надмина денешниот ривал на прволигашката табела.

Арсенал постави цена од 65,5 милиони евра за спортските права на напаѓачот Виктор Ѓекереш, објави „Football Insider“.

Клубот е подготвен да се раздели со 28-годишниот Швеѓанец доколку одлучи да замине во следните 12 месеци, но сака целосно враќање на надоместокот што му го платиле на Спортинг за него.

Во сезоната 2026/27, напаѓачот имаше една асистенција на девет натпревари. Во сезоната 2025/26, тој имаше 21 гол и три асистенции на 55 натпревари.

Ѓекереш наводно е фрустриран од времето за играње и сериозно размислува да замине следното лето. Арсенал верува дека цената од 65,5 милиони евра е коректна и нема да ги одврати заинтересираните неколку клубови од Италија, Шпанија и Премиер лигата.

Договорот на фудбалерот со Арсенал е со важност до 30 јуни 2030 година. „Трансфермаркт“ ја проценува трансферната вредност на играчот на 55 милиони евра.

Еди Хау е главен фаворит за нов менаџер на Манчестер Јунајтед доколку раководството на клубот одлучи да му врачи отказ на Мајкл Карик, објавуваат англиските медиуми. Поранешниот тренер на Њукасл е високо рангиран меѓу потенцијалните наследници, пред сè поради своето искуство во Премиер-лигата.

Притисокот врз Карик се зголеми по убедливиот пораз од Комо со 4:1 во Лигата на шампионите, со што продолжи лошата серија на „црвените ѓаволи“.

Според медиумските информации, спортскиот директор Џејсон Вилкокс го гледа Хау како сериозна опција за преземање на тимот. Меѓу останатите кандидати се споменуваат Јулијан Нагелсман, Антонио Конте и Фабијан Хирцелер.

Фенербахче остана без Марко Асенсио и Нејтан Аке поради повреди, поради кои двајцата фудбалери ќе бидат надвор од терените во одреден период, соопшти турскиот клуб.

Поранешниот шпански репрезентативец Асенсио имал операција на коленото во својата татковина и се очекува да отсуствува најмалку три месеци.

Аке има повреда на мускулот на десната нога. Холандскиот дефанзивец настапи во вторникот на натпреварот против Славија Прага, кој заврши нерешено 2-2 во Лигата на шампионите.

Снимките покажале дека за неговото закрепнување ќе бидат потребни најмалку три недели.