Тренерот на Вардар, Иван Чупиќ, на денешната прес-конференција во пресрет на мечот против Висла Плоцк, зборуваше за состојбата во тимот и за противникот.

Вардар во четврток со почеток од 20:45 часот во „Јане Сандански“ ја пречекува Висла Плоцк во третиот натпревар од Лигата на шампионите.

„Ни доаѓа Висла која е во топ 10-12 во Европа, тим кој долго години е заедно со истиот тренер. Последните седум-осум години покажуваат врвни резултати и во домашното првенство и во Лигата на шампионите. Јас одамна поминав низ доминацијата на Киелце во Полска, но во последните години Висла го презеде приматот. Тоа е само доказ за нивното ниво. Се подготвуваме како секогаш, со добра енергија, анализа и тренинг. Веруваме дека во полн „Јане Сандански“ никому нема да му е лесно. Сакаме по двата натпревара без бодови на кои игравме добро, да стигнеме до првата победа. Сигурно дека ни недостигаа по гол-два на претходните средби. Не сакам да зборувам за притисокот, тоа за мене е привилегија. Ова е наш пат кој ќе трае барем до крајот на сезоната. Нема успех без порази, не доаѓа бргу и преку ноќ. Мислам дека по првите два меча во ЛШ одигравме навистина добро, одигравме машки, ама очигледно тоа што го презентираме во овој момент не беше доволно за ова ниво. Ако беше доволно ќе имавме бодови на контото. Не сакам да барам алиби, иако игравме добро со Мелсунген, а потоа малку подобро против Нант. Сега верувам дека ќе го кренеме нивото, особено бидејќи Педро се врати и дава нота повеќе“, вели Чупиќ.

Тренерот на Вардар ја истакнува одбраната на полскиот тим, вели дека е најдобра во Лигата на шампионите.

„Кога ја анализиравме Висла, екипа која според мој вкус игра најдобра одбрана во Лигата на шампионите. Тоа ќе биде голем предизвик за нашиот напад, мора да сме подобри од натпреварите со Охрид, Нант и Мелсунген. За оваа одбрана на Висла која плаќа 3-4 играчи само за одбрана, нашиот напад мора да биде како никогаш оваа сезона ако сакаме да освоиме бодови. Сепак, и без добра одбрана бадијала би биле добри во нападот. Сите сегменти мора да се на нивото, но ако морам да изберам еден кој може да реши ќе биде нашиот напад. Висла игра навистина врвна одбрана, тактички се дисциплинирани и за мене е навистина голем предизвик“.

Кин импресиониран од доминацијата на Белингем

Џуд Белингем одигра уште еден натпревар со кој покажа зошто веќе е меѓу најважните фудбалери на англиската репрезентација. Во убедливата победа на Англија од 7–0 против Хрватска во Лигата на нации, фудбалерот на Реал Мадрид постигна еден гол и запиша три асистенции, а неговото издание предизвика силни реакции во англиската јавност.

Особено импресиониран беше поранешниот капитен на Манчестер Јунајтед, Рој Кин, кој по натпреварот во студиото на „ITV“ не штедеше зборови за 23-годишниот играч од средниот ред.

„Изгледаше како возрасен човек да игра против мали деца“, рече Кин, обидувајќи се да ја опише физичката и техничката надмоќ што Белингем ја имаше на теренот.

Англија целосно ја надигра Хрватска во Риека, а победата од 7:0 воедно беше и најтешкиот пораз во историјата на хрватската репрезентација.

„Не е само тоа што го прави со топката“

За Кин, најголемиот квалитет на Белингем не е само неговата техника, головите или способноста да создава шанси. Поранешниот ирски репрезентативец особено го истакна неговиот ангажман кога Англија ја нема топката.

Кин смета дека токму тој дел од играта го издвојува Белингем од многу други офанзивни фудбалери. Иако веќе има статус на една од најголемите ѕвезди на Реал Мадрид и Англија, неговата подготвеност да притиска, да се враќа во одбрана и да работи за тимот има дополнително влијание врз соиграчите.

„Кога имате играч кој е толку добар со топката, игра за Реал Мадрид, а сепак работи толку напорно без неа, тоа ги инспирира и сите останати“, истакна Кин, додавајќи дека Белингем веќе има огромна лидерска улога во англискиот состав.

И селекторот Томас Тухел беше задоволен од начинот на кој Англија функционираше и со и без топка, нарекувајќи го настапот против Хрватска „комплетна изведба“.

Кин оди чекор понатаму: Белингем може меѓу најголемите во историјата

Најсилната изјава на Кин сепак дојде кога зборуваше за тоа до каде може да стигне кариерата на Белингем.

„Мислам дека има уште многу што може да покаже. Белингем може да стане еден од најдобрите фудбалери на сите времиња“, изјави Кин.

Исклучително висока оценка за фудбалер кој има само 23 години, но Белингем веќе зад себе има искуство на највисоко клупско и репрезентативно ниво. Против Хрватска тој директно учествуваше во четири погодоци, и стана првиот англиски играч од средниот ред по Дејвид Плат во 1993 година со четири директни учества во голови на еден репрезентативен натпревар.

Белингем сè почесто добива послободна улога зад Хари Кејн, што му овозможува да се движи меѓу линиите, да влегува во шеснаесетникот и да влијае врз играта на повеќе позиции. Таквата поставеност беше една од причините што неговиот настап против Хрватска изгледаше толку доминантно.

Барселона направи уште еден важен чекор во задржувањето на клучните фудбалери од актуелниот состав. Бразилскиот репрезентативец Рафиња го потпиша новиот договор со каталонскиот клуб, кој треба да важи до 30 јуни 2030 година.

Сите детали меѓу Барселона, фудбалерот, неговите претставници и адвокати се договорени, а документите се потпишани од двете страни. Официјалното соопштение и церемонијата за продолжување на соработката се очекуваат во текот на оваа недела, а како можен термин се посочува петок, доколку административната процедура се одвива според планот.

Продолжувањето не доаѓа неочекувано. Уште во септември спортскиот директор на Барселона, Деко, јавно потврди дека разговорите со Рафиња се во напредна фаза и дека клубот планира Бразилецот да остане дел од тимот во следните четири години.

Од неизвесна иднина до еден од најдобрите во светот

Патот на Рафиња во Барселона не беше секогаш едноставен. Тој пристигна од Лидс во летото 2022 година, но во еден период неговата иднина во клубот беше предмет на бројни шпекулации. Ситуацијата значително се промени по доаѓањето на Ханси Флик, под чие водство Бразилецот доби поголема доверба, слобода во играта и сè поважна улога во тимот.

Рафиња постепено се наметна како еден од лидерите на каталонскиот состав, не само со головите и асистенциите, туку и со интензитетот, пресингот и влијанието врз играта. Во сезоната 2024/25 тој постигна 34 голови и запиша 25 асистенции на 56 натпревари, што беше една од причините Барселона уште во мај 2025 година да го продолжи неговиот тогашен договор до 2028 година.

Во меѓувреме, неговото значење во тимот дополнително порасна. Самиот Рафиња неодамна јавно истакна дека сака да остане во клубот подолго и дека би бил задоволен доколку кариерата ја заврши во Барселона.

Со новиот договор, Барселона практично ја обезбедува иднината на еден од најважните фудбалери во актуелниот проект. Претходната соработка требаше да трае до летото 2028 година, а новата спогодба ќе ја продолжи за дополнителни две сезони.

Останува уште Барселона официјално да ја потврди зделката. Сепак, според последните информации, договорот е комплетиран и потпишан, па формалното соопштение од клубот треба да биде последниот чекор во продолжувањето на соработката со Бразилецот.

Еден од најдобрите напаѓачи во историјата на Манчестер Сити, Сехио Агуеро, проговори за големата ѕвезда на Челзи, Кол Палмер.

„Кога бев таму, тој немаше многу можности да игра за Сити бидејќи имаше многу играчи од врвно ниво кои беа во добра форма.

Преминувањето во Челзи функционираше добро бидејќи му требаше да игра. Според мене, тој е сега најдобриот играч на Челзи“ – рече Аргентинецот.

Денес ќе биде комплетирано четвртото коло од Лигата на нации, веќе може да се анализираат некои сегменти од натпреварувањето.

Статистиката вели дека досега гол не примила само селекцијата на Северна Ирска која се натпреварува во Лига Б. Таа е прво место во својата група во која се уште и Унгарија, Украина и Грузија.

Ирците имаат дадено четири голови, а немаат примено ниту еден. Имаат две победи и две нерешени со резултат 0-0.

Сите останати селекции без разлика дали имаат одиграно три или четири натпревари, примиле барем по еден гол.

Четири селекции не постигнале гол, тоа се Македонија, Грузија, Сан Марино и Лихтенштајн.

Додека во ек се шпекулациите околу тоа кој ќе ја добие најпрестижната индивидуална награда во фудбалот, „Златната топка“, „Тутоспорт“ ја објави листата на номинирани за наградата „Златно момче“.

„Тутоспорт“, оваа награда за најдобар млад играч ја доделува од 2003 година, а првиот освојувач беше Рафаел ван дер Варт, тогашен фудбалер на Ајакс. Лани наградата му припадна на Дезире Дуе од ПСЖ.

Интересно е што и Хрватска и Босна и Херцеговина имаат свој претставник, во Лука Вушковиќ и Карим Алајбеговиќ.

Според сите прогнози, прв фаворит е Пау Кубарси, кој имаше фантастична сезона во Барселона, крунисана со освојување на титулата светски шампион. Кубарси на Мундијалот во САД, Канада и Мексико беше прогласен за најдобар млад фудбалер.

Номинираните за наградата оваа година се:

Пау Кубарси – Барселона
Ајуб Буади – Манчестер Сити
Ворен Заир-Емери – ПСЖ
Јан Диоманде – Реал Мадрид
Лука Вушковиќ – Брајтон
Виктор Фрохолд – Порто
Мајлс Луис-Скели – Арсенал
Рајан – Борнмут
Јорел Хато – Челзи
Ленарт Карл – Баерн Минхен
Естевао – Челзи
Ендрик – Реал Мадрид
Ели Жуниор Крупи – Борнмут
Џанлука Престијани – Бенфика
Константинос Карецас – Борусија Дортмунд
Саид Ел Мала – Келн
Џон Мартин – Реал Сосиедад
Марк Бернал – Барселона
Керим Алајбеговиќ – Јувентус
Кин Фелх – Штутгарт

Заедно со нив, уште пет фудбалери се најдоа на листата како „вајлд карта“:

Хараламбос Костулас – Брајтон
Жоан Гадо – Борусија
Франко Мастантуоно – Фиорентина
Родриго Мора – Рома
Чави Еспарт – Барселона.