Манчестер Јунајтед направи голем чекор кон новиот стадион со 100.000 седишта

Манчестер Јунајтед направи еден од најзначајните чекори во планот за изградба на нов стадион со капацитет од 100.000 гледачи. Извршниот директор на клубот, Омар Берада, потврди дека е завршена важната фаза со обезбедувањето на земјиштето кое ќе биде дел од предложената локација на новиот дом на „црвените ѓаволи“.

Потврдата дојде на 23 септември, во рамки на објавувањето на финансиските резултати на Манчестер Јунајтед за фискалната 2026 година. Берада нагласи дека, покрај финансиската стабилност и развојот на тимовите, проектот за нов стадион останува една од главните долгорочни цели на клубот.

„Нашата друга главна област на фокус е планот за развој на нов стадион со 100.000 седишта. Сега го завршивме големиот чекор со обезбедување на земјиштето кое ќе биде дел од предложената локација на новиот стадион“, порача Берада.

Патот до оваа точка започна неколку месеци претходно. Во јуни Манчестер Јунајтед соопшти дека купил парцела од околу 25 акри, лоцирана приближно 350 метри северозападно од сегашниот „Олд Трафорд“. Земјиштето беше купено од компанијата „Indurent“, која е дел од портфолиото на „Blackstone“, а клубот тогаш објави дека со договорот е обезбеден поголемиот дел од просторот потребен за проектот.

Изборот на локација во непосредна близина на сегашниот стадион е особено важен за Јунајтед. Наместо клубот целосно да се оддалечи од местото со кое е поврзан повеќе од еден век, идејата е новиот стадион да остане во срцето на областа Олд Трафорд.

Доколку проектот биде реализиран според најавениот план, стадионот со 100.000 места би станал најголемата спортска арена во Обединетото Кралство. Тоа би претставувало значително зголемување во споредба со сегашниот „Олд Трафорд“, кој има капацитет од нешто повеќе од 74.000 гледачи.

Клубот соработува со „Trafford Council и Old Trafford Regeneration Mayoral Development Corporation“ на проект кој треба да донесе нови станбени објекти, подобра инфраструктура, работни места и дополнителни комерцијални и забавни содржини. Според плановите објавени од клубот, пошироката регенерација опфаќа околу 370 акри, со потенцијал за околу 15.000 нови домови и десетици илјади работни места.

Обезбедувањето на земјиштето не значи дека изградбата започнува веднаш, проектот и натаму треба да помине низ следните развојни и плански фази. Сепак, со отстранувањето на една од најголемите практични пречки, визијата за стадион со 100.000 места веќе е значително поблиску до реализација.