Џелал Нури Демиртурк, претседател на Дисциплинската Комисија во Турската Фудбалска Федерација (ТФФ), поднесе оставка откако во јавноста протекоа приватни пораки од „WhatsApp“ во кои се открива отворена пристрасност против тренерот на Фенербахче, Жозе Мурињо. 

Во пораките, кои брзо се проширија, членовите на комисијата покажуваат непријателство кон Мурињо и разговараат за начини како да го казнат поради неговите јавни критики на турските судии. Во една од пораките наводно стои дека ќе го „натераат да плати“, што предизвика бурни реакции и сериозни сомнежи за непристрасноста на дисциплинските одлуки. 

Мурињо, кој ја презеде функцијата во Фенербахче минатата година, гласно ја критикуваше арбитражата во Турција, нарекувајќи ја непостојана и пристрасна. Поради тие изјави беше парично казнет и суспендиран – од истата комисија која сега е под прашање. 

Фенербахче реагираше остро, објавувајќи соопштение во кое ги осуди откриените разговори и побара целосна истрага. Клубот ја обвини комисијата за нарушување на принципите на фер игра и побара темелни реформи во рамките на ТФФ. 

Скандалот ги заостри барањата за транспарентност и отчетност во турскиот фудбал. По оставката на Демиртурк, Басбуг Пинарбаши е назначен за нов претседател на Дисциплинската Комисија. Турската Фудбалска Федерација сè уште нема издадено официјално соопштение. 

Манчестер Сити и Манчестер Јунајтед внимателно го следат голманот на ФК Порто, Диого Коста, кој ова лето сака да направи нов чекор во кариерата и да се пресели во Премиер Лигата. 

Португалецот, кој има 25 години, веќе шест сезони е прв избор меѓу стативите во Порто и верува дека е подготвен за нов предизвик во поголема лига. Премиер Лигата е негова најпосакувана дестинација. 

Манчестер Јунајтед го гледа Коста како можен наследник на Андре Онана, кој минатата сезона имаше нестабилни настапи. Сепак, откупната клаузула од 75 милиони евра може да претставува пречка, иако Порто би можел да прифати понуда блиску до 60 милиони евра поради актуелната пазарна ситуација. 

Од другата страна на градот, Манчестер Сити исто така го брка Коста, имајќи предвид дека се очекува заминување на Едерсон. Гвардиола го цени Коста поради неговата смиреност, способноста за игра со нога и одличното позиционирање. Сити веќе е во напредни преговори и сака рано да го затвори трансферот, со цена што би можела да се движи околу 50 милиони фунти—под неговата клаузула. 

Интересот од двата клуба од Манчестер ја нагласува сè поголемата репутација на Коста како еден од најдобрите голмани во Европа. Иако Сити во моментов е во предност и добил првичен позитивен сигнал од играчот, Јунајтед не се откажува и може да го засили интересот додека трае трансфер прозорецот. 

Тотенхем Хотспур го финализираше трансферот на перспективниот јапонски дефанзивец Кота Такаи од Кавасаки Фронтале за сума од 5 милиони фунти – рекорден износ за јапонски фудбалер кој се сели од Џеј-Лигата во Европа. 

Дваесетгодишниот дефанзивец ќе се приклучи на првиот тим на Спарси пред стартот на новата сезона. Роден во 2004 година, Такаи веќе остави силен впечаток и на клупско и на репрезентативно ниво, со 78 настапи и 4 гола откако дебитираше за сениорскиот тим на Кавасаки во 2022 година. 

Тој досега има четири настапи за сениорската репрезентација на Јапонија, а дебитираше во квалификациски натпревар за Светското Првенство во септември 2024 година. Иако најчесто игра како централен бек, може да покрие и на позицијата десен бек. 

Неговите одлични настапи во 2024 година беа крунисани со наградата за најдобар млад играч во Џеј-Лигата. Истиот период ја освои и Јапонската Супер Куп титула со Кавасаки, како и АФК Купот за под-23 репрезентации со младата селекција на Јапонија. 

Техничкиот тим на Тотенхем го идентификуваше Такаи како играч со голем потенцијал кој може да го засили дефанзивниот ред. Тој потпиша петгодишен договор со можност за продолжување уште една сезона, а Кавасаки Фронтале задржува 10% од следниот трансфер. 

Лионел Меси денес го слави својот 38-ми роденден, отворајќи ново поглавје во кариера што веќе речиси две децении ја фасцинира фудбалската јавност. Од тинејџерска сензација во Барселона до лидерска фигура во Интер Мајами и аргентинската репрезентација, неговиот пат е вистинска легенда. 

И со тоа што го одведе Интер Мајами до осминафиналето на Клупското светско првенство, тој останува верен на својата уникатна статистика – никогаш не отпаднал во групна фаза на ниту едно големо натпреварување. 

Со повеќе од 850 голови и над 380 асистенции во кариерата, Меси важи за еден од најпродуктивните фудбалери во историјата. Осум „Златни Топки“, четири титули од Лигата на Шампионите и кулминацијата – светската титула со Аргентина во 2022 година – се само дел од неговите достигнувања. Со Барселона, ПСЖ и сега Интер Мајами, тој има освоено рекордни 45 трофеи на клупско ниво. 

И во доцните триесетти, Меси продолжува да прави историја. Во 2024 година постави нови МЛС рекорди за асистенции и вкупен број поени на еден натпревар, стана најдобар стрелец во историјата на Интер Мајами и беше прогласен за МВП на сезоната. Во 2025, стана најбрзиот играч што достигнал 40 голови во МЛС. 

Но влијанието на Меси не се мери само во бројки. Неговата креативност, скромност и постојана желба за совршенство го прават симбол на инспирација. На 38 години, тој останува не само фудбалска икона, туку и пример за генерациите што доаѓаат. 

Виктор Ѓокереш ја информираше управата на Спортинг дека сака да го напушти клубот, со што дополнително се продлабочува кризата меѓу шведскиот напаѓач и португалскиот тим. Според извештаи, Ѓокереш лично му соопштил на претседателот Фредерико Варандаш дека нема намера да се врати на тренинзите, наведувајќи непомирливи разлики. 

Несогласувањата настанале поради наводен договор за заминување. Ѓокереш чувствува дека бил излажан, откако му било ветено дека ќе може да замине летово за сума пониска од неговата откупна клаузула—ветување за кое сега верува дека клубот го прекршил. Луѓе блиски до играчот велат дека е разочаран и решен да побара нова средина. 

Арсенал моментално е во водство во трката за потписот на 27-годишниот голгетер. Преговорите се во тек, а играчот, според информациите, има јасна желба да се пресели во Лондон, и покрај интересот од други европски клубови. 

Со оглед на тоа што Ѓокереш нема намера да се врати на тренинзите, Спортинг е под сè поголем притисок да најде решение. Се чини дека заминувањето е неизбежно, со што ќе заврши неговата етапа во Лисабон на разочарувачки начин. 

Реал Мадрид е подготвен да размисли за продажба на крилниот напаѓач Родриго, под услов да добие понуда од околу 90 милиони евра, објави „Кадена СЕР“.

Клубот планира да ги искористи средствата за да го купи играчот од средниот ред на барање на главниот тренер Чаби Алонсо .

Лондонски Арсенал покажа интерес за Родриго, но самиот Бразилец има намера да побара други опции. Познато е дека Манчестер Сити го следи 24-годишниот крилен напаѓач.

Минатата сезона, Родриго одигра 51 натпревар во сите турнири, постигнувајќи 14 гола и 10 асистенции. Тековниот договор на играчот со клубот е со важност до летото 2028 година. Според информациите пазарната вредност на играчот е 90 милиони евра.

Македонските претставници ги финализираат подготовките за настапите во европските квалификации, а речиси сите натпревари ќе се играат на Националната арена „Тодор Проески“.

Шкендија ја чека двомеч со шампионот на Велс, ТНС, во првото претколо од Лигата на шампионите. Првиот меч Тетовчани ќе го одиграат на гости, а реваншот е закажан за 15 јули од 20:30 часот на најголемиот македонски стадион.

Во Конференциската лига, два од три македонски клуба како домаќини ќе настапуваат исто така на „Тодор Проески“. Вардар ќе го отвори европскиот циклус на 10 јули против аутсајдерот Ла Фиорита од Сан Марино – мечот започнува во 20:30 часот.

Работнички доби предност да остане на арената, каде што и дел од домашните натпревари ги игра редовно. „Романтичарите“ ќе го пречекаат грузиски Торпедо Белаж на 17 јули со почеток од 18:00 часот.

Од македонските екипи, само Силекс се одлучи за поинакво решение. Кратовци ќе го играат реваншот со црногорски Дечиќ на теренот на тренинг центарот на ФФМ „Петар Милошевски“ исто така на 17, но во терминот од 19:00.

Македонскиот прволигаш Работнички официјализираше нов долгорочен договор со младинскиот репрезентативец на Македонија, Теодор Николовски, потврдувајќи ја својата посветеност кон развојот на млади таленти од домашната сцена.

Николовски го продолжи својот престој во клубот од Дебар Маало до 2028 година, што претставува јасен сигнал дека „романтичарите“ гледаат светла иднина во овој перспективен фудбалер.

Минатата сезона 20-годишниот играч направи значителен чекор напред, добивајќи повеќе простор во првиот тим – настапи на 20 натпревари и се запиша меѓу стрелците со еден гол.

Томас Милер ги игра последните натпревари за Баерн Минхен на Светскиот клупски шампионат, и во исто време ќе се открие неговиот идeн клуб, при што во САД се сигурни дека тоа ќе биде ФК Лос Анџелес.

Германскиот новинар Флоријан Плетенберг го посочи следниот клуб на иконата на Бајерн, повикувајќи се на зборовите на спортскиот директор на Филаделфија Јунион Ернст Танер.

“Ни го понудија Томас Милер, продолжувам да одржувам добра врска со неговите агенти. Но, од финансиска гледна точка не е реалистично за нашиот тим. ФК Лос Анџелес е партнер на Бајерн. Би се изненадил ако не отиде таму,” напиша директорот на Филаделфија.

Милер има амбиција да направи многу силен Светски клупски шампионат со Бајерн и да стигне што е можно подалеку, дури и да го освои трофејот пред да се раздели. ФК Лос Анџелес исто така е меѓу учесниците на турнирот на ФИФА, но нема шанси да се пласира во директните елиминации по две загуби во првите два натпревари – од Челзи со 0:2 и од Eсперанс Тунис со 0:1.