Иднината на Антонио Рудигер во Реал Мадрид станува сè понеизвесна. Некогаш клучен играч во тимот, Рудигер постепено го губи местото во тимот на Чаби Алонсо. 

Алонсо не е импресиониран од настапите и однесувањето на Рудигер, а според извештаите, се поставува прашање колку одбранбеникот одговара на неговите тактички замисли. Постојат информации за напнатост на тренинзите, при што Алонсо приватно му укажувал на Рудигер за дисциплина и фокус. 

Проблемите на Рудигер дополнително ги усложнува бавната рехабилитација од повредата, што ја намалува неговата шанса за враќање во почетниот состав. Во вакви околности, Реал Мадрид размислува за засилување на одбраната со нови играчи – Конате, Упамекано, итн. 

Напаѓачот на Барселона, Роберт Левандовски, се здоби со мускулна повреда на бицепс феморисот, поради што ќе отсуствува од терените на неопределено време. Повредата се случила за време на тренинг, дополнително зголемувајќи ги проблемите за тимот кој веќе се соочува со бројни отсутни играчи. 

Клубот не прецизира колку долго ќе трае опоравувањето, истакнувајќи дека тоа ќе зависи од текот на закрепнувањето. Медицинскиот тим останува внимателно оптимистички настроен, но нагласува дека е потребно трпение за да се избегнат компликации. 

Овој удар доаѓа во чувствителен момент, бидејќи Барселона се подготвува за интензивен период во Ла Лига и европските натпревари. Како врвен голгетер, Левандовски остава празнина што може клубот скапо да ја плати. 

Медицинскиот тим на Барса работи на индивидуален план за рехабилитација, со цел фудбалерот да се врати во полна форма. Пристапот е постепен и внимателен, со оглед на сложеноста на ваквите повреди кај професионалните спортисти. 

Ламин Јамал и Фермин Лопез се вратија во групните тренинзи на Барселона пред натпреварот од Ла Лига против Жирона. Двајцата играчи, кои претходно беа надвор поради повреди, целосно учествуваа во утринската сесија, што е охрабрувачки знак за нивното закрепнување и ја зголемува длабочината на составот. 

Враќањето на Јамал е особено значајно откако повредата на препоните, добиена во натпреварот против Пари Сен Жермен, го спречи да игра за Шпанија на неодамнешните интернационални натпревари. Неговиот настап ја зајакнува нападната линија на Барселона во периодот со голем број натпревари. 

Меѓутоа, Рафиња сè уште се опоравува од повредата на бутот и работи на рехабилитација. Бразилскиот крилен напаѓач интензивно се подготвува да биде спремен за средината на октомври, но сè уште не се приклучил на групните тренинзи. 

Во врска со голманите, Хоан Гарсија се уште се опоравува од операцијата на коленото. По артроскопската интервенција на скршен медијален менискус, се очекува уште четири до шест недели рехабилитација, што го исклучува од клучните наредни натпревари, вклучувајќи го и Ел Класико. 

Од сезоната 2027/28, Лигата на Шампионите ќе започне со нов концепт што ќе му даде посебен третман на актуелниот шампион. УЕФА објави дека бранителот на титулата ќе ја отвори новата сезона сам, во натпревар што ќе се игра во вторник вечер, без други мечеви тој ден. 

Наместо класичниот распоред со повеќе паралелни дуели, шампионот ќе ја има целата сцена само за себе. Натпреварот ќе биде придружен со спектакуларна церемонија и ќе се пренесува глобално преку водечка стриминг платформа. Со овој потег, УЕФА сака да го засили интересот и да му оддаде посебна почит на најдобриот тим од минатата сезона. 

Останатите натпревари од групната фаза ќе се играат во среда и четврток, што дополнително го нагласува статусот на шампионот. Овој нов распоред има за цел да привлече поголема публика и да го претвори стартот на сезоната во вистински фудбалски спектакл. 

Капитенот на Арсенал, Мартин Одегард, ќе биде надвор од терените до крајот на ноември поради повреда на коленото што ја доби на натпреварот против Вест Хем во Премиер Лигата. Норвежанецот има оштетување на медијалниот колатерален лигамент, што значи дека ќе пропушти најмалку девет натпревари за клубот и за репрезентацијата. 

Ова е сериозен удар за Арсенал, кој влегува во интензивен дел од сезоната со клучни мечеви во Премиер Лигата и Лигата на Шампионите. Одегард е незаменлива фигура во средниот ред, со својата визија, креативност и лидерство. 

Медицинскиот тим на Арсенал внимателно ја следи состојбата на играчот, кој е во постојан третман и рехабилитација. Иако повредата го тргнува од терените на неколку недели, не се очекува да биде долгорочна. Ако закрепнувањето оди според планот, Одегард би можел да се врати веднаш по ноемвриската репрезентативна пауза, со надеж дека ќе биде подготвен за дербито со Тотенхем. 

И Арсенал и Норвешка се внимателни во пристапот кон неговото закрепнување, со цел да се избегне какво било дополнително влошување. Се надеваат дека капитенот ќе се врати навреме за најважниот дел од сезоната. 

Поранешниот англиски репрезентативец и некогаш голема надеж на Арсенал, Џек Вилшер, официјално ја започна својата тренерска кариера откако беше назначен за нов менаџер на Лутон Таун.

Клубот од Англија денеска ја потврди информацијата, соопштувајќи дека помошник на Вилшер ќе биде Крис Пауел. На клупата на Лутон тој доаѓа како наследник на Мет Блумфилд, кој беше отпуштен по серија слаби резултати.

Интересно е што токму во Лутон Вилшер ги направи своите први фудбалски чекори, пред на деветгодишна возраст да премине во младинската академија на Арсенал.

„Ова за мене е огромна чест и привилегија. Чувството е како да сум затворил еден круг. Првпат стапнав во овој клуб како осумгодишно дете, а сега се враќам како тренер. Судбина е што токму Лутон ми ја дава првата можност како главен тренер. Навистина сум среќен и горд што сум повторно тука – овој клуб многу значи за мене“, изјави Вилшер по назначувањето.

Торинскиот Јувентус започна преговори за трансфер на 18-годишниот фудбалер на Баерн, Адин Личина. 18-годишниот офанзивец е член на Баерн Минхен, но многу брзо може да потпише за уште еден фудбалски гигант.

Ќе го решиме проблемот со отпадот ако го гледаме како ресурс, а не како ѓубре! Бидејќи Баерн Минхен сè уште не му понуди продолжување на соработката, Личина води преговори со друг великан – торинскиот Јувентус. Преговорите веќе се одржаа.

Исто така, Борусија Дортмунд ја следи ситуацијата со талентираниот фудбалер, но Јувентус е во одлична позиција да го доведе како слободен фудбалер следното лето.

„Јувентус е во конкретни преговори со Адин Личина, чиј договор со Баерн истекува следното лето. Борусија Дортмунд исто така е заинтересирана за 18-годишниот офанзивец. Меѓутоа, со развојот на Кенан Јилдиз, кој имаше сличен пат, Јувентус е во добра позиција да го убеди да дојде во Торино“.

Баерн ќе се обиде да го задржи. Сепак, уште не му понудиле продолжување на соработката на овој фудбалер.

Треба секако да се истакне дека Личина порано беше поврзуван и со други великани. Милан, Реал Мадрид, Барселона и РБ Лајпциг се интересираа за неговите услуги, но тој остана во Баерн.

Фудбалската репрезентација на Македонија одигра 1-1 против Казахстан во меч од квалификациите за Светското првенство 2026, кое ќе се одржи во САД, Канада и Мексико.

Натпреварот не започна најдобро за избраниците на Благоја Милевски, кој по мечот ги сподели своите впечатоци на прес-конференција.

„Да можам, би ја сменил почетната постава и дел од играчите. Не бевме изненадени од Казахстан, но имавме малку материјал за анализа. Планот беше да се наметнеме со одредена тактика, но не функционираше, па направивме замени уште на полувремето. Второто полувреме веќе беше она вистинското лице на Македонија. Миовски принудно играше на странична позиција, но бргу мораше да се направи корекција. Ако не го сменивме системот ќе морав да направам замена уште во 15-тата минута“, истакна Милевски.

Тој додаде дека тимот бил нервозен на стартот, што било резултат на големиот напор во мечот со Белгија.

„Во првиот дел загубивме многу дуели и втори топки, но реакцијата во продолжението беше токму она што го очекував. Им честитам на фудбалерите – со играта во второто полувреме заслуживме победа, но фудбалот е понекогаш суров. Казахстан одигра одлично, но сепак ние бевме поблиску до триумф. Кога ќе видам дека сите се разочарани по реми, тоа ми кажува дека имаме карактер и квалитет. Во овие изминати 14 официјални натпревари сме без пораз и примивме само пет гола. Разочарувањето сега само покажува дека сме созреан тим. Во Кардиф ќе одиме да уживаме во фудбалот, а што ќе донесе тоа, ќе видиме“, изјави селекторот Милевски на прес – конференцијата по натпреварот.