Екипата на Мекларен од Формула 1 потпиша договор со 13-годишниот возач на картинг, Уго Угочукву. Како што пренесува Би-Би-Си, Мекларен ќе го поддржи младиот американски возач во текот на учеството во јуниорските категории. Мекларен наведе дека овој повеќегодишен договор дава можност со Угочукву во иднина да се потпише и тркачки договор. Тоа значи дека Американецот во иднина би можел да вози во Формула 1 или во други категории. „Со голем интерес го следиме напредокот на Уго, па кога излезе можност за потпишување на договор, немаше двоумење.“ – вели извршниот директор на Мекларен, Зек Браун. Мекларен, како и многу екипи во Формула 1, има програма за млади возачи. Најуспешен од таа програма е Луис Хамилтон, кој своевремено како 13-годишен потпиша договор со Мекларен. Угочукву, чија мајка е Нигеријка, а татко Американец, минатата година го освои јуниорскиот шампионат на ФИА, а годинава премина во сениорска категорија. Во Формула 1 нема американски возач уште од Александар Роси, кој возеше пет трки за Маруси во 2015. година.

Австриецот Мануел Фелер е победник на слаломот во швајцарскиот Лендерхајд, со кој е завршена сезоната за скијачи во Светскиот куп. Фелер, кој беше шести по првото возење, до победата стигна со резултат 1:47,24. Второто место го освои Французинот Клемон Ноел со 0,08 секунди заостанување, додека трет беше неговиот сонародник и освојувач на Големиот кристален глобус, Алекси Пантуро, кој имаше заостанување од 0,11 секунди. Малиот кристален глобус во оваа дисциплина претходно го обезбеди Австриеот Марко Шварц. Шварц на оваа трка беше најдобар после првото возење, но поради грешка во второто, не можеше повисоко од шестото место. Австриецот во табелата на слалом е прв со 665 бодови, зад него е Ноел со 553, додека Рамон Ценхојзерн е трет со 503. Вкупниот победник и освојувач на Големиот кристален глобус, Пантуро, сезоната ја заврши со 1.260 поени, Марко Обермат собра 1.093, а Шварц 814.

Некогашниот шампион во Формула 1, Нико Розберг оцени дека возачот на Ред Бул, Макс Верстапен сезонава има најголеми шанси да го победи седумкратниот светски шампион Луис Хамилтон во борбата за титулата. Розберс своевремено беше тимски колега со Хамилтон во Мерцедес и е единствен возач кој успеа да го спречи Британецот да освои титула, откако е воведена хибридната турбо ера во 2014. година. Хамилтон сезонава ќе се обиде да ја освои рекордната осма титула шампион на Формула 1, Розберг вели дека и понатаму е тешко да се замисли дека некој друг може да биде подобар од Хамилтон во текот на целата сезона, но дека најголема шанса за тоа има Верстапен. Запрашан за тоа на кого би се обложил во борбата за титулата, Розберг одговори: „На Хамилтон, бидејќи никој не може да замисли дека некој навистина може да го победи Луис во текот на целата сезона по бројот на бодови, така што пари би уплатил на Луис. Но, Макс Верстапен е посебно блиску во предсезоната, по прашањето на шанси да биде подобар од Луис во борбата за титула. Мислам дека никој не бил толку блиску веќе долго, долго време.“ – оцени Розберг, кој својата единствена титула ја освои во 2016. година, по што ја заврши кариерата.

Голманот на мадридски Реал, Андреј Лунин стапи во брак со долгогодишната девојка Анастасија Тамазова. Овој 22-годишен фудбалер изненади многумина со комбинацијата на облека од венчавката, а фотографиите кои веднаш се проширија на интернет станаа тема на разговор на социјалните мрежи. Лунин се ожени облечен во тренерки, додека неговата избраничка на венчавката пристигна во издание кое не беше особено луксузно. „Важен и посебен ден во нашиот живот. Те сакам.“ – напиша Лунин на својот Инстаграм профил.

Во новата сезона на Формула 1, еден од домаќините ќе биде и Саудиска Арабија.
Трката во Саудиска Арабија ќе биде одржана во декември, а сега е познато и како ќе изгледа стазата. Се работи за улична стаза во должина од 6,175 километри по круг и ќе биде втора најдолга во календарот, веднаш зад легендарната Спа-Франкоршамп.
Просечната брзина ќе биде околу 250 километри на час, со што трката во Џеда ќе биде најбрзата улична трка во календарот на Формула 1.

Шпанскиот мотоциклист и шесткратен светски првак Марк Маркес конечно се врати на стазата по осуммесечната пауза поради повреда.
Шпанецот одвози неколку кругови на стазата во Каталонија, а тимот на Хонда, за кој Маркес настапува, соопшти дека добил дозвола од лекарите за враќање на стазата.
По кршењето на десната рака на 19. јули минатата година во Херез, во текот на првата трка на Мото ГП сезоната, Маркес беше опериран три пати, последен пат во декември.
Моментално се наоѓа на списокот на возачи за првата трка во новата сезона, која се вози во Катар на 28. март.
„Ако тоа не биде возможно, ќе се обидам да бидам подготвен за втората трка во Катар на 4. април. А, ако ниту тоа не е можно, ќе се обидам да бидам во Португалија на 18. април.“ – изјави Маркес минатиот месец.

Емил Павлов освои бронзен медал на К1 Премиер лигата во Истанбул, Турција откако го совлада казакстанецот Каисар Албисбаир со 4-1. Претходно на патот до меч за бронзата, завчера Емил ги победи Аминага Гулијев од Азербејџан со 3-0, Афеф Гаит од Јордан со 3-2 а со победата против Матиас Гарсиа Гомез од Шпанија со резултат од 8-3 се пласираше во полуфиналето, каде што беше поразен од азербејџанецот Фирдовси Ферзалиев .Од нашите спортисти, пласман на 7 место во категорија- 75 км постигна Доан Османи, а Берат Јакупи вокатегорија – 84 кг оствари три победи и пораз, но немаше репасаж. Во истата категорија Виктор Крстевски имаше две победи, како и Абдурахом Идризи во – 60 кг. Во кати, Пулексенија Јовановска оствари пласман на 13тото место. К1 Премиер лигата во Истанбул се бодува за олимписката листа на WKF и беше прво големо натпреварување по една година пауза во каратето а настапија вкупно 584 каратисти од 72 земји.

Јапонските власти не се согласуваат со одлуката на Меѓународниот олимписки комитет (МОК) да ја прифати понудата Кина да обезбеди вакцини против Ковид-19 за учесниците на Летните и Зимските олимписки игри во Токио и во Пекинг, јавија денеска светските агенции.
Министерката во Владата на Јапонија задолжена за организација на Игрите, Тамајо Марукава, посочи дека МОК не ја консултирал Јапонија за кинеските вакцини. Таа порача дека јапонските спортисти нема да се вакцинираат со кинеските вакцини, бидејќи истите не се одобрени за користење во земјата.
Преземаме сеопфатни мерки против заразни болести во подготовките за Игрите во Токио со цел да овозможиме учество на спортистите без вакцинирање. Нема промени во нашиот став дека вакцинацијата нема да биде услов, изјави Марукава.
Реакцијата на властите во Токио доаѓа ден откако претседателот на МОК, Томас Бах, обелодени дека е постигнат договор со Олимпискиот комитет на Кина за обезбедување дополнителни дози вакцини против коронавирус за учесниците на претстојните Летни олимписки игри во Токио, како и за спортистите, кои ќе настапат на Зимските олимписки игри во Пекинг идната година.

Томас Бах е реизбран на позицијата прв човек на Интернационалниот олимписки комитет. Тој победи на изборите со убедлив резултат 93-1 и ќе продолжи да раководи на кормилото на ИОК до 2025 година. Германецот го наследи Жак Рог на претседател на ИОК во 2013 година. Минатата година ИОК реши да ги одложи Олимпските игри во Токио и да ги презакаже за оваа година, но прашање е дали ќе може да се одржат со публика.